អាកាសយានដ្ឋាន ដែលត្រូវបានបំផុសគំនិត ដោយយកគំរូតាមប្រាសាទប្រពៃណីរបស់សាសនាហិណ្ឌូ នឹងត្រូវសាងសង់បញ្ចប់សព្វគ្រប់ឆាប់ៗនេះ ក្នុងទីក្រុងប្រាសាទ Ayodhya ភាគខាងជើងប្រទេសឥណ្ឌា។ នេះបើតាមការឲ្យដឹងពីមន្ត្រី នៅថ្ងៃអង្គារ (ទី១២ ខែធ្នូ) នេះ។

ដោយត្រៀមក្លាយជាអាកាសយានដ្ឋានដំបូង និងតែមួយគត់របស់ទីក្រុងនេះ ជំហាននេះ ត្រូវបានគេមើលឃើញថា ជាសញ្ញាបង្កើតនូវបរិយាកាសពិសេស សម្រាប់ការសម្ពោធប្រាសាទដ៏ល្បីល្បាញ «Ram Janmabhoomi» (ទីកន្លែងកំណើតរបស់អាទិទេព Ram) នៅខែមករាឆ្នាំក្រោយ។

ការរចនាអាកាសយានដ្ឋាននេះ ត្រូវបានបំផុសគំនិតដោយយកគំរូតាមប្រាសាទនេះ និងមានការរចនាបែបជនជាតិភាគតិច និងអក្សរចារឹក ឆ្លាក់នៅលើអាគារ។ ស្ថាបត្យករនៃព្រលានយន្តហោះនេះ បាននិយាយថា «ការរចនាគួរតែយកតាមខ្លឹមសាររបស់ទីក្រុង»។

ប្រាសាទនេះត្រូវបានឧទ្ទិសដល់អាទិទេពហិណ្ឌូ Rama។ ប្រាសាទនេះត្រូវបានសាងសង់នៅលើទីតាំងនៃអតីតវិហារអ៊ីស្លាមពីសតវត្សរ៍ទី១៦ ដែលត្រូវបានកម្ទេចដោយអ្នកគាំទ្រគណបក្សជាតិនិយមហិណ្ឌូ ក្នុងឆ្នាំ១៩៩២។ ព្រឹត្តិការណ៍នៅទីក្រុង Ayodhya នាពេលនោះ បានបង្កឲ្យមានកុបកម្មសហគមន៍ នៅក្នុងតំបន់ជាច្រើននៃប្រទេសឥណ្ឌា។ មនុស្សប្រហែល ២.០០០នាក់ ដែលភាគច្រើនជាជនមូស្លីម ត្រូវបានសម្លាប់៕