ប៉ាឡេស្ទីន ៖ យោងតាមទិន្នន័យផ្លូវការចេញផ្សាយដោយភាគីទាំងពីរ ចំនួនអ្នកស្លាប់ដោយសារជម្លោះប៉ាឡេស្ទីន និងអ៊ីស្រាអែល ដែលកំពុងបន្តបានកើនឡើងជាង១៩.៦០០នាក់ ។ 

ក្រសួងសុខាភិបាលតំបន់ហ្កាហ្សាបាននិយាយកាលពីថ្ងៃចន្ទថា ចំនួនអ្នកស្លាប់ប៉ាឡេស្ទីនបានកើនឡើងដល់ ១៨.២០៥នាក់ ដោយសារការវាយប្រហាររបស់អ៊ីស្រាអែលលើតំបន់ហ្កាហ្សា ចាប់តាំងពីថ្ងៃទី ៧ ខែតុលា។  

យោងតាមក្រសួងសុខាភិបាលកាលពីរសៀលថ្ងៃចន្ទ ការវាយប្រហាររបស់អ៊ីស្រាអែលលើតំបន់ហ្កាហ្សាក្នុងរយៈពេលប៉ុន្មានម៉ោងកន្លងទៅនេះតែមួយគត់ បានឆក់យកជីវិតមនុស្សចំនួន ២០៨ នាក់ ដោយជនរងគ្រោះជាច្រើននៅតែកប់នៅក្រោមគំនរកម្ទេចថ្ម បែកបាក់។  

ក្រសួងសុខភាពប៉ាឡេស្ទីនដែលមានមូលដ្ឋាននៅទីក្រុងរ៉ាម៉ាឡា (Ramallah) ធ្លាប់បាននិយាយថា មនុស្ស ២៧៥នាក់ ក៏បានស្លាប់ផងដែរនៅក្នុងតំបន់West Bank គិតត្រឹមយប់ថ្ងៃទី ៩ ខែធ្នូ។  

ទិន្នន័យកន្លងទៅថ្មីៗនេះពីអ៊ីស្រាអែល បានបង្ហាញថា ចំនួនអ្នកស្លាប់របស់ខ្លួនពីការវាយប្រហារកាលពីថ្ងៃទី ៧ ខែតុលា របស់ក្រុមហាម៉ាស គឺប្រហែល ១.២០០ នាក់ ។

កាលពីថ្ងៃចន្ទ កងទ័ពអ៊ីស្រាអែលបានចេញសេចក្តីប្រកាសមួយទៀតដែលតម្រូវឱ្យប្រជាជននៅតំបន់ហ្កាហ្សាភាគខាងជើងជម្លៀសខ្លួនទៅភាគខាងត្បូង។   

កាលពីថ្ងៃចន្ទដដែល កងទ័ពអ៊ីស្រាអែលបានបន្តការវាយប្រហារតាមអាកាសនៅតំបន់ផ្សេងៗនៃតំបន់ហ្កាហ្សាស្ទ្រីប និងការប្រយុទ្ធប្រឆាំងនឹងក្រុមហាម៉ាសនៅក្នុងទីក្រុង Khan Younis ភាគខាងត្បូងនៃតំបន់ហ្កាហ្សានេះ។ក្រុមហាម៉ាស់បាននិយាយថា ខ្លួនបានបន្តការបាញ់ប្រហារតបតទៅកាន់កងកម្លាំងអ៊ីស្រាអែល ដោយការបាញ់គ្រាប់រ៉ូកែត និងវាយប្រហារលើការតាំងទីលំនៅមួយចំនួននៅក្នុងប្រទេសអ៊ីស្រាអែលភាគខាងត្បូង៕