ភ្នំពេញ ៖ សហភាពអឺរ៉ុបបានបើកផ្តល់ហិរញ្ញប្បទានសហប្រតិបត្តិការចំនួន ៨២ លានអឺរ៉ូ ស្មើនឹង ៨៨ លានដុល្លារអាមេរិក ក្នុងឆ្នាំ ២០២៣ នេះ ដើម្បីគាំទ្រការអនុវត្តគម្រោងក្នុងវិស័យកសិកម្ម, បរិស្ថាន, ឧស្សាហកម្ម, អប់រំ, ពាណិជ្ជកម្ម និងវិស័យឯកជន។ 

​ឯកឧត្តម ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធានទី២ នៃក្រុមប្រឹក្សាអភិវឌ្ឍន៍កម្ពុជា នៅក្នុង ពិភាក្សាការងារជាមួយ ឯកឧត្តម Igor Driesmans ឯកអគ្គរដ្ឋទូតសហភាពអឺរ៉ុបប្រចាំកម្ពុជា នៅថ្ងៃទី ១២ ខែ ធ្នូ ឆ្នំា២០២៣ នេះ បានថ្លែង អំណរគុណយ៉ាងជ្រាលជ្រៅ និងវាយតម្លៃខ្ពស់ចំពោះសហភាពអឺរ៉ុប ដែលបានបន្តបេ្តជ្ញាផ្តល់ការគាំទ្រដល់កម្ពុជា ពិសេសសមិទ្ធផលសម្រេច បានក្នុងការអនុវត្តយុទ្ធសាស្ត្ររួមរបស់អឺរ៉ុប ស្តីពីកិច្ចសហប្រតិបត្តិការអភិវឌ្ឍន៍សម្រាប់កម្ពុជា ឆ្នាំ២០២១-២០២៧ និងកម្មវិធីណែនាំពហុឆ្នាំ របស់សហភាពអឺរ៉ុប សម្រាប់កម្ពុជា ឆ្នាំ២០២១-២០២៧ ដែលបានរួមចំណែកយ៉ាងសំខាន់ ក្នុងការអភិវឌ្ឍសង្គម-សេដ្ឋកិច្ចកម្ពុជា ។ 

ឯកឧត្ដមទេសរដ្ឋមន្ដ្រី ក៏បានកោតសរសើរចំពោះសហភាពអឺរ៉ុប សម្រាប់គំនិតផ្តួចផ្តើមក្រុមអឺរ៉ុប ដែលជាយន្តការសំខាន់ ក្នុងការជួយ គាំទ្រប្រទេសកំពុងអភិវឌ្ឍន៍ រួមទាំងប្រទេសកម្ពុជាផងដែរ ក្នុងការទាក់ទាញការវិនិយោគប្រកបដោយចីរភាព ជាពិសេសសហភាពអឺរ៉ុប ក៏បានរួមចំណែកជាមួយរាជរដ្ឋាភិបាលកម្ពុជា ក្នុងការឆ្លើយតបទៅនឹងការទប់ស្កាត់ការរីករាលដាលនៃជំងឺកូវីដ-១៩ ផងដែរ។ 

ឯកឧត្តម Igor Driesmans បានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា និងវឌ្ឍនភាពសម្រេចបាន ក្នុងកិច្ចអភិវឌ្ឍន៍នៅកម្ពុជា និងកោតសរសើរចំពោះក្រុមប្រឹក្សាអភិវឌ្ឍន៍កម្ពុជា ដែលបានបន្តផ្តល់កិច្ចសហការ និងភាពជាដៃគូយ៉ាងល្អប្រសើរ កន្លងមក ។ ក្នុងជំនួបនេះដែរ ឯកឧត្តមឯកអគ្គរដ្ឋទូត ក៏បានជម្រាបជូនអំពីវឌ្ឍនភាពនៃដំណើរការយុទ្ធសាស្ត្ររួមរបស់អឺរ៉ុបឆ្នាំ២០២១-២០២៧ កម្មវិធីណែនាំពហុឆ្នាំរបស់សហភាពអឺរ៉ុបថ្មី ឆ្នាំ២០២១-២០២៧ និងគំនិតផ្តួចផ្តើម Team Europe ព្រមទាំងចក្ខុវិស័យរបស់សហភាពអឺរ៉ុប ក្នុងការបន្តកិច្ចសហប្រតិបត្តិការល្អប្រសើរជាមួយកម្ពុជា នៅពេលអនាគត។ 

គួរបញ្ជាក់ផងដែរថា សហភាពអឺរ៉ុបគឺជាដៃគូអភិវឌ្ឍន៍មួយដ៏សំខាន់របស់កម្ពុជា ក្នុងនោះយោងតាមទិន្នន័យហិរញ្ញប្បទានសហប្រតិបត្តិការ កម្ពុជា (Cambodia ODA Database) គិតចាប់ពីឆ្នាំ ១៩៩២ ដល់ ២០២២ សហភាពអឺរ៉ុបបានបើកផ្តល់ហរិញ្ញប្បទាន សហប្រតិបត្តិការ ប្រមាណ ១ ៤៣០ លានដុល្លារអាមេររិក ស្មើនឹង ៤,៩ % នៃហិរញ្ញប្បទានផ្តល់ដោយដៃគូអភិវឌ្ឍន៍ទាំងអស់ ៕ អត្ថបទ៖ សុន រ៉ាឌី

​