របាយការណ៍ស៊ើបការណ៍សម្ងាត់របស់សហរដ្ឋអាមេរិក ដែលត្រូវបានចេញផ្សាយជាសាធារណ បានវាយតម្លៃថា សង្រ្គាមអ៊ុយក្រែន បានធ្វើឲ្យទាហានរុស្ស៊ីស្លាប់ និងរបួសចំនួន ៣១៥.០០០នាក់ ឬជិត ៩០ភាគរយនៃបុគ្គលិក ដែលប្រទេសនេះមាន នៅពេលជម្លោះបានចាប់ផ្តើម។ នេះបើតាមប្រភព ដែលដឹងពីចារកម្មនេះ បានឲ្យដឹងកាលពីថ្ងៃអង្គារ ទី១២ ខែធ្នូ។

ប្រភពដដែលនេះ បានបង្ហើបថា របាយការណ៍ក៏បានវាយតម្លៃផងដែរថា ការខូចខាតរបស់ទីក្រុងមូស្គូ ក្នុងផ្នែកបុគ្គលិក និងរថពាសដែកដោយសារយោធាអ៊ុយក្រែន បានរុញឲ្យការធ្វើទំនើបកម្មយោធារបស់រុស្ស៊ីថយក្រោយរយៈពេល ១៨ឆ្នាំ។

ពាក់ព័ន្ធនឹងករណីនេះ ស្ថានទូតរុស្ស៊ីបានបង្វែរសំណើសុំការអត្ថាធិប្បាយទៅកាន់ក្រសួងការពារជាតិរុស្ស៊ីនៅទីក្រុងមូស្គូវិញ។ តែក្រសួងការពារជាតិមិនបានឆ្លើយតបនឹងសំណើសុំការអត្ថាធិប្បាយនេះនោះទេ។

យ៉ាងណាក្ដី មន្ត្រីរុស្ស៊ី បាននិយាយថា ការប៉ាន់ប្រមាណរបស់លោកខាងលិចនៃចំនួនអ្នកស្លាប់របស់រុស្ស៊ី ក្នុងសង្គ្រាម គឺជាការបំផ្លើសយ៉ាងហួសហេតុ ហើយស្ទើរតែមើលរំលងការខូចខាតរបស់អ៊ុយក្រែនជានិច្ច ដែលមន្ត្រីរុស្ស៊ី ប្រាប់ថា មានចំនួនច្រើនមហាសាល៕