មន្ត្រីការពារជាតិជាន់ខ្ពស់ម្នាក់ បាននិយាយថា មេដឹកនាំអេស្តូនី កំពុងវាយតម្លៃជម្រើសក្នុងការធ្វើឲ្យប្រទេសបាល់ទិកនេះដែលត្រូវបានគេស្គាល់ថា ជាកន្លែងចាប់ផ្តើមអាជីវកម្មតាមអ៊ីនធឺណិតរបស់ខ្លួន ឲ្យទៅជាប្រទេសផលិតគ្រាប់រំសេវ សម្រាប់ទីផ្សារអ៊ឺរ៉ុបដែលកំពុងរីកចម្រើន។

លោក Tuuli Duneton អនុរដ្ឋលេខាធិការទទួលបន្ទុកគោលនយោបាយការពារជាតិ បានថ្លែងប្រាប់ សារព័ត៌មាន Defence News នៅក្នុងបទសម្ភាសន៍មួយថា៖«អ៊ុយក្រែន ត្រូវការគ្រាប់រំសេវបន្ថែមទៀត ហើយប្រទេសនានា មានស្តុកទុកជាច្រើន ដើម្បីបំពេញបន្ថែមផងដែរ»។ លោកស្រី បាននិយាយសំដៅទៅលើភាពស្វាហាប់ដែលបណ្តាប្រទេសនៅអឺរ៉ុប កំពុងផ្តល់គ្រាប់រំសេវដល់ទីក្រុងគីវ ខណៈពេលជាមួយគ្នានឹងការបង្កើនផលិតកម្មសម្រាប់កម្លាំងផ្ទាល់ខ្លួន។ « ជាគោលការណ៍ រដ្ឋាភិបាលអេស្តូនី បានធ្វើការសម្រេចចិត្តថា អេស្តូនី អាចមានឧស្សាហកម្មការពារ នៅក្នុងផ្នែកគ្រាប់រំសេវ»។

ប្រទេសអេស្តូនី ពឹងផ្អែកខ្លាំងលើការនាំចូល នៅពេលនិយាយអំពីគ្រឿងយុទ្ធោបករណ៍ រួមទាំងគ្រាប់រំសេវផងដែរ។ រដ្ឋាភិបាល នឹងត្រូវការការផ្គត់ផ្គង់ជាបន្តបន្ទាប់សម្រាប់ការទិញសព្វាវុធ បន្ទាប់ពីការឈ្លានពានរបស់រុស្ស៊ីមកលើអ៊ុយក្រែន។

ជាឧទាហរណ៍ ប្រទេសអេស្តូនី បានបើកការដេញថ្លៃកាលពីខែមុនសម្រាប់ការទិញគ្រាប់កាំភ្លើងធំ ១៥៥  មិលី្លម៉ែត្រតម្លៃជាង ៣០០លានដុល្លារ។