ប្រធានរដ្ឋសភាឥណ្ឌា បាននិយាយថា នគរបាលបានចាប់ខ្លួនមនុស្ស ២នាក់ ដែលបានលោតចេញពីកន្លែងសាធារណជនចូលទៅក្នុងសភាជាន់ទាបរបស់ឥណ្ឌា នៅថ្ងៃពុធ (ទី១៣ ខែធ្នូ) នេះ ដែលជាការរំលោភច្បាប់សន្តិសុខយ៉ាងធ្ងន់ធ្ងរ នៅថ្ងៃគម្រប់ខួបនៃការវាយប្រហារលើអាគាររដ្ឋសភានេះ ដែលបណ្ដាលឲ្យមានអ្នកបាត់បង់ជីវិត កាលបីឆ្នាំ២០០១។

ជាមួយគ្នានេះ ប្រធានសភាលោក Om Birla បាននិយាយថា អ្នកសមគំនិត ២នាក់ផ្សេងទៀត ក៏ត្រូវបានចាប់ខ្លួននៅខាងក្រៅរដ្ឋសភាផងដែរ។ រូបភាពពីទូរទស្សន៍បានបង្ហាញថា ឆ្មាំសន្តិសុខបានបង្ក្រាបអ្នកលុកលុយទាំងនោះ នៅពេលដែលម្នាក់ ក្នុងចំណោមពួកគេ បានឡើងលើតុនៃកន្លែងអង្គុយរបស់សមាជិកសភា។ លោក Senthil Kumar សមាជិកសភាដែលមានវត្តមានក្នុងរដ្ឋសភានោះ បាននិយាយថា ជនទាំងនោះបានកាន់កំប៉ុងតូចៗ ដែលមានបញ្ចេញផ្សែងពណ៌លឿង។

ម្នាក់ក្នុងចំណោមអ្នកដែលត្រូវបានចាប់ខ្លួន បាននិយាយថា នាងគឺជានិស្សិត ដែលតវ៉ានឹងភាពអត់ការងារធ្វើ ដែលកើនឡើងជាលំដាប់។ ខណៈនាងត្រូវបាននគរបាលនាំខ្លួនទៅ នាងបានប្រាប់អ្នកសារព័ត៌មានថា៖ «រដ្ឋាភិបាល មិនបានឮសំឡេងរបស់ប្រជាជននោះទេ។ មិនអាចមានរបបផ្តាច់ការ ក្នុងប្រទេសនេះទេ»។

សូមបញ្ជាក់ថា សមាជិកសភានៅព្រឹកព្រលឹមថ្ងៃនេះ បានប្រារព្ធខួបនៃការវាយប្រហារឆ្នាំ២០២១ លើរដ្ឋសភាឥណ្ឌា ពីសំណាក់ក្រុមប្រដាប់អាវុធ ដែលបានសម្លាប់មន្ត្រីនគរបាល ៦នាក់ សន្តិសុខ ២នាក់ និងអ្នកថែសួនម្នាក់។ ហើយអ្នកវាយប្រហារទាំង ៥នាក់ ត្រូវបានសម្លាប់ដោយកងកម្លាំងសន្តិសុខ។ ឥណ្ឌាបានបន្ទោសការវាយប្រហារនេះលើក្រុម ដែលមានមូលដ្ឋាននៅប្រទេសប៉ាគីស្ថាន៕