បើយោងតាមភ្នាក់ងារភ្នំភ្លើងរបស់ប្រទេសឥណ្ឌូនេស៊ី បានឲ្យដឹងថា ភ្នំភ្លើង Marapi បានផ្ទុះឡើងនៅថ្ងៃពុធ (ទី១៣ ខែធ្នូ) នេះ ដោយបានព្រួសផេះភ្នំភ្លើងឡើងទៅលើអាកាស រហូតដល់ទៅកម្ពស់ ៥០០-៦០០ម៉ែត្រ។

វីដេអូដែលថតដោយសាក្សីម្នាក់ បានបង្ហាញពីសំណុំដ៏ក្រាស់នៃផេះពណ៌ប្រផេះពីលើភ្នំភ្លើង នៅកោះស៊ូម៉ាត្រាខាងលិច។ តែយ៉ាងណាក្ដី អ្នកស្រុកដែលរស់នៅក្នុងភូមិមួយ ក្នុងចំណោមភូមិផ្សេងទៀត ដែលនៅជិតបំផុតនឹងភ្នំភ្លើង Marapi នៅតែត្រូវបានគេមើលឃើញថា កំពុងធ្វើសកម្មភាពប្រចាំថ្ងៃជាធម្មតា។

ប្រធានទីភ្នាក់ងារភ្នំភ្លើងឥណ្ឌូនេស៊ី លោក Hendra Gunawan បាននិយាយថា ការព្រួសផេះ នៅថ្ងៃពុធនេះ មានបរិមាណតិចតួចប៉ុណ្ណោះ ដោយការអត្ថាធិប្បាយរបស់លោក បានធ្វើឡើង បន្ទាប់ពីមានការផ្ទុះមួយទៀត កាលពីសប្តាហ៍មុន ដែលបានសម្លាប់មនុស្ស ២៣នាក់។

ដោយមានកម្ពស់ ២.៨៩១ម៉ែត្រ Marapi គឺជាភ្នំភ្លើងដ៏សកម្មបំផុតមួយរបស់កោះស៊ូម៉ាត្រា ក្នុងប្រទេសឥណ្ឌូនេស៊ី និងលាតសន្ធឹងកាត់មហាសមុទ្រប៉ាស៊ីហ្វិក ដែលគេហៅថា «Ring of Fire» (មណ្ឌលភ្នំភ្លើង) ដែលជាទីកន្លែងនៃភ្នំភ្លើងសកម្មជាង ១០០ភ្នំភ្លើង៕