ភ្លៀងរដូវរងាដ៏ត្រជាក់បានវាយប្រហារតំបន់ហ្កាហ្សាដែលរងការវាយប្រហារដោយសង្គ្រាមកាលពីថ្ងៃពុធ ទី ១៤ ខែធ្នូ ធ្វើអោយប្រជាជនប៉ាឡេស្ទីនរងទុក្ខវេទនា ត្រូវបាន​បង្ខំឱ្យចាក​ចេញ​ពី​ផ្ទះ​សម្បែង​របស់ខ្លួន ហើយឥឡូវនេះកំពុងជ្រកកោននៅក្នុងតង់លិចទឹក។  

នៅឯជំរំតង់​មួយក្នុងទីក្រុង Rafah ស្ថិតនៅលើដីខ្សាច់ដែលពោរពេញដោយសំរាម មនុស្សកំពុង​ព្យាយាម​ក្រោក​ពីយប់ដ៏រន្ធត់មួយ ដោយយកធុងខ្សាច់ដើម្បីបិទទប់ល្បាប់ នៅខាងក្នុង ឬនៅ​ខាង​ក្រៅ​តង់​របស់ពួកគេ ។

គ្រួសារ​ខ្លះមានជម្រកតង់ត្រឹមត្រូវ ប៉ុន្តែអ្នកផ្សេងទៀត កំពុងស្នាក់នៅក្នុងជម្រកដែលត្រូវបានប្រើ ដោយ​ក្រណាត់កៅស៊ូ ឬជ័រស្តើងៗដែលផលិតឡើងដើម្បីការពារទំនិញកុំឲ្យទទឹក មិនមែន​ផ្តល់​ជា​ទី​ជម្រក​សម្រាប់មនុស្សនោះទេ។ តង់ជាច្រើនពុំមានកម្រាលទេ ដូច្នេះនៅពេលយប់ មនុស្ស​ត្រូវ​ស្នាក់​នៅ​ផ្ទាល់នឹងដីខ្សាច់សើម។

បុរសវ័យ​កណ្តាល ឈ្មោះ រ៉ាម៉ាដាន ម៉ូហាដាដ(Ramadan Mohadad) ដែល​កំពុង​ព្យាយាម​ជួស​ជុល​ជម្រក​គ្រួសាររបស់លោកសាងសង់ឡើងពីបន្ទះក្តារ និងបន្ទះប្លាស្ទិកស្តើងៗបាននិយាយថា ជម្រក​របស់លោកត្រូវបានរហែក ហើយទឹកបានស្រក់លើពួកលោក។

លោក​និយាយថា ទាំងលោក ក៏ដូច​ជា​ពលរដ្ឋ​ប៉ាឡេស្ទីន​ផ្សេង​ទៀត​បាន​ត្អូញ​ត្អែរ​ពី​កង្វះ​សម្លៀក​បំពាក់​កំដៅខ្លួន ភួយ និងសម្ភារៈការពារទឹកភ្លៀង។ 

អ៊ីស្រាអែលបដិសេធថាពុំមានផែនការរុញជនជាតិប៉ាឡេស្ទីនចូលក្នុងឧបទ្វីបស៊ីណៃទេ ខណៈ​អេហ្ស៊ីប​បាន​និយាយថាខ្លួនមិនចង់ឲ្យមានការមកដល់ច្រើនពីពលរដ្ឋនៅតំបន់ហ្កាហ្សាទេ។ ទោះ​ជា​យ៉ាង​ណាក៏ដោយ របងព្រំដែនហ្កាហ្សា-អេហ្ស៊ីប ត្រូវបានបំពាននាពេលកន្លងមក ដែល​ជំរុញ​ឱ្យ​មាន​ការ​ព្រួយបារម្ភថា ការជម្លៀសខ្លួនដែលមិនអាចគ្រប់គ្រងបានអាចកើតឡើងនៅពេលនេះ៕