ដោយការបោះឆ្នោតមេដឹកនាំកោះតៃវ៉ាន់ឆ្នាំ២០២៤ ខិតជិតមកដល់ អ្នកបោះឆ្នោត​ទាំង​ក្មេង​ទាំងចាស់​កំពុងពិបាក​សម្រេច​ចិត្ត​ក្នុង​ការ​ជ្រើសរើស​គណបក្ស​ដែល​មាន​ជំហរ​ខុស​គ្នា​ចំពោះ​ប្រទេស​ចិន ខណៈការរំពឹងទុកនៃការបង្រួបបង្រួមទឹកដីដោយបង្ខំខិតកាន់តែជិត។

សម្រាប់អតីតយុទ្ធជនវ័យចំណាស់មួយចំនួននៅក្នុងមណ្ឌលថែទាំមួយក្នុងទីក្រុង តាវយ័ន (Taoyuan) ការរំលឹកអំពីជម្លោះអតីតកាលជាមួយប្រទេសចិន ដែល​អះ​អាង​សិទ្ធ​លើ​កោះស្វ័យ​គ្រប់​គ្រង​តាមបែបប្រជាធិបតេយ្យ តៃវ៉ាន់ ត្រូវបានឆ្លាក់​ជាប់​លើ​ស្បែក​របស់​ពួក​គេក្នុ​ង​ទម្រង់​នៃ​ស្នាម​សាក់​ប្រឆាំងនឹងកុម្មុយនិស្ត។

អតីតយុទ្ធជនចំណាស់ម្នាក់ដែលមានស្នាមសាក់រូបទង់ជាតិសាធារណរដ្ឋចិននៅលើទ្រូងរបស់ខ្លួនពីលើស្លាកស្នាមដ៏ធំមួយបានប្រាប់សារព័ត៌មានរ៉យទ័រ ថា «សង្រ្គាមដែល លោកស្រី សៃ អ៊ីងវិន (Tsai Ing-wen) កំពុងព្យាយាមបង្កនៅពេលនេះ គឺគួរឲ្យខ្លាចខ្លាំងណាស់។ មកដល់ថ្ងៃនេះ ខ្ញុំនៅតែមិនហ៊ានមើលព័ត៌មានឡើយពេលមើលទូរទស្សន៍ម្ដងៗ។ សង្គ្រាម​គឺ​ជា​រឿង​ដ៏​សាហាវ​ឃោរឃៅ និងគ្រោះថ្នាក់ណាស់»។

ក្នុង​រយៈពេល ៤ឆ្នាំកន្លងមកនេះ ប្រទេស​ចិន​បាន​បង្កើន​សម្ពាធ​យោធា​របស់​ខ្លួន​ប្រឆាំង​នឹង​កោះ​នេះ រួមទាំងការរៀបចំល្បែងសង្រ្គាមសំខាន់ៗចំនួនពីរ ដោយបង្ក​ឱ្យ​មាន​ការ​ភ័យខ្លាច​នៃ​សង្រ្គាម​ដែល​អាច​អូសទាញដល់សហរដ្ឋអាមេរិក។

ភាពតាន​តឹងទាំងនោះកំពុងគ្របដណ្តប់លើការធ្វើយុទ្ធនាការរហូតដល់ការបោះឆ្នោតមេដឹកនាំ និង​សភា​នៅ​ថ្ងៃទី១៣ ខែមករា របស់កោះតៃវ៉ាន់នាពេលខាងមុខនេះ។ គំនិត​នៃ​ការ​បង្រួប​បង្រួម​ជាមួយ​ប្រទេសចិន គឺមិនពេញនិយមនោះទេជាពិសេសចំពោះយុវវ័យនៅកោះតៃវ៉ាន់ ដែល​មើល​ឃើញ​ខ្លួន​ឯងថាជាជនជាតិតៃវ៉ាន់ច្រើនជាងជាជនជាតិចិន៕