ភ្នំពេញ៖ អគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្ម នឹងរៀបចំ​ពិព័រណ៍​ផលិត​ផល​ខ្មែរ និងទំនិញនាំចេញ-នាំចូល លើកទី១៦ ចាប់ពីថ្ងៃទី១៥ ដល់១៨ ខែធ្នូ ឆ្នាំ២០២៣ នៅមជ្ឈ​មណ្ឌល​សន្និបាត និងពិព័រណ៍កោះពេជ្រ ក្នុងគោលបំណងលើកកម្ពស់សកម្មភាពពាណិជ្ជកម្ម និង​វិនិយោគ​នៅ​កម្ពុជា ជាពិសេសដើម្បីជំរុញការតភ្ជាប់ទំនាក់ទំនងពាណិជ្ជកម្ម រវាងកម្ពុជា និង​សហគម​អន្តរជាតិ។

មន្រ្តីក្រសួងពាណិជ្ជកម្ម បានឲ្យទូរទស្សន៍ព័ត៌មាន ប៊ីធីវី ដឹងនៅព្រឹកថ្ងៃទី១៤ ខែធ្នូនេះថា កម្ម​វិធី​ពិព័រណ៍​នេះ មានស្តង់សរុបចំនួន ២៣២ស្តង់ (ក្នុងស្រុកចំនួន ១៦៤ស្តង់) ដោយមានក្រុមហ៊ុន សហ​គ្រាសចូលរួមចំនួន១៣៦ ក្នុងនោះក៏មានការចូលរួមពី ១៧ប្រទេសផងដែរ រួមមាន អូស្រ្តាលី ចិន បារំាង ជប៉ុន ឡាវ ហ្វីលីពីន និងឥណ្ឌូនេស៊ី។ល។ ដែលមានដាក់តាំងនូវផលិតផល និង​សេវា​ជា​ច្រើន​ប្រភេទ មានដូចជា៖ ផលិតផលកសិកម្ម កសិ-ពាណិជ្ជកម្ម ផលិតផល​សម្គាល់​ភូមិ​សាស្រ្ត​ទំនិញ (GI) ផលិតផលហាឡាលកម្ពុជា ផលិតផលធ្វើពីសូត្រនិងការកែច្នៃ អង្ករ ស្វាយចន្ទី ម្រេច ដំឡូងមី វត្ថុអនុស្សាវរីយ៍ សម្ភារៈ គ្រឿងអលង្ការ-ត្បូងថ្មមានតម្លៃ និងគ្រឿងសម្អាង ម្ហូប​អាហារ​កែច្នៃ និងភេសជ្ជៈ សេវាអប់រំនិងការអាន សេវាធនាគារ និងគម្រោងវិនិយោគជាដើម។

ប្រភពដដែល បានឲ្យដឹងទៀតថា ក្រៅពីកម្មវិធីពិព័រណ៍ ក្រសួង​ពាណិជ្ជកម្ម​ក៏​មាន​រៀបចំ​នូវ​កម្ម​វិធី​ផ្សេង​ៗ​ទៀត ដូចជា៖ជំនួបពាណិជ្ជកម្ម ស្តីពីជំរុញការនាំចេញផលិតផលសក្តានុពលកម្ពុជា ទៅ​កាន់​ទីផ្សារ​អន្តរជាតិ , វេទិកាជំរុញធុរកិច្ចវិនិយោគកម្ពុជា-ឥណ្ឌូណេស៊ី , ការប្រគំតន្រ្តី និងការ​សម្រប​សម្រួលជាមួយដៃគូពាក់ព័ន្ធ រៀបចំឱ្យមានភ្ញៀវបរទេសជាអ្នកទស្សនាពាណិជ្ជកម្ម “Trade Visitors” មកពីប្រទេសឡាវ ភូមា និងប្រទេសចិន មកទស្សនាពិព័រណ៍ និងបាន​ជួប​ផ្ទាល់​ជា​មួយ​ពាណិជ្ជករ​កម្ពុជា​តាមស្ថានភាពជាក់ស្តែង៕ អត្ថបទ៖ ឈិត បូរ៉ាវី