កម្ពុជាបានបំពេញកាតព្វកិច្ចជាសមាជិកអង្គការសហប្រជាជាតិយ៉ាងសកម្ម ជាពិសេសការបញ្ចូនកងទ័ពមួកខៀវស្វែងរកសន្តិភាព ក្រោមឆត្រអង្គការសហប្រជាតិ។ នេះបើតាមការឱ្យដឹងពីឯកឧត្តម ប៉ែន បូណា អ្នកនាំពាក្យរាជរដ្ឋាភិបាល បានប្រាប់BTV នៅថ្ងៃទី១៤ខែធ្នូនេះ ដែលជាថ្ងៃខួប៦៨ឆ្នាំ ប្រទេសកម្ពុជាចូលជាសមាជិកអង្គការសហប្រជាជាតិ។
ឯកឧត្តមបន្តថា ព្រះរាជាណាចក្រកម្ពុជាចូលជាសមាជិកអង្គការសហប្រជាជាតិគឺមានសារៈសំខាន់ណាស់ ដើម្បីសមាហរកម្មប្រទេសយើងទៅក្នុងសមាគមអន្តរជាតិឱ្យគេទទួលស្គាល់ប្រទេសកម្ពុជាជារដ្ឋអធិបតេយ្យមួយដែលអាចឈរស្មើមុខស្មើមាត់ដូចបណ្តាប្រទេសផ្សេងៗទៀត។ ហើយប្រទេសកម្ពុជា មានកិច្ចសហប្រតិបត្តិការល្អជាមួយបណ្តាប្រទេសដែលជាសមាជិកអង្គការសហប្រជាជាតិ។
ប្រទេសកម្ពុជាបានចូលជាសមាជិកអង្គការសហប្រជាជាតិ (UN) នៅថ្ងៃទី ១៤ ខែធ្នូ ឆ្នាំ១៩៥៥ ដោយគិតត្រឹមឆ្នាំ១៤ ខែធ្នូ ឆ្នាំ២០២៣នេះ គឺមានរយៈពេល៦៨ឆ្នាំ។ អង្គការសហប្រជាជាតិ គឺជាអង្គការអន្តរជាតិដែលធំជាងគេបំផុតក្នុងពិភពលោក ត្រូវបានបង្កើតឡើងនៅថ្ងៃទី២៤ ខែតុលា ឆ្នាំ១៩៤៥ ក្រោយសង្គ្រាមលោកលើកទី២ត្រូវបានបញ្ចប់។ អង្គការនេះ បង្កើតឡើងក្នុងគោលបំណងថែរក្សាសន្តិភាព និងសន្តិសុខអន្តរជាតិ លើកស្ទួយសហប្រតិបត្តិការអន្តរជាតិក្រោមច្បាប់អន្តរជាតិ អភិវឌ្ឍផ្នែកសេដ្ឋកិច្ច ចូលរួមអន្តរាគមន៍ដោះស្រាយជម្លោះរវាងរដ្ឋជាសមាជិក និងបញ្ចៀសមិនអោយមានសង្គ្រាមលោក៕ អត្ថបទ៖ទូច សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
