នៅថ្ងៃទី១៤ ខែធ្នូនេះ សម្ដេចវិបុលសេនាភក្តី សាយ ឈុំ ប្រធានព្រឹទ្ធសភា និងជាព្រះរាជ​តំណាង​ដ៏ខ្ព​​ង់ខ្ពស់ ព្រះករុណាជាអម្ចាស់ជីវិតលើត្បូង បានអញ្ជើញ​បើក​អនុសំវច្ឆរ​មហាសន្និបាត​មន្រ្តី​សង្ឃ​ទូទាំង​ប្រទេស លើកទី ៣១ ដែលនៅមហាសន្និបាតនេះ នឹងជំរុញទីវត្តអារាម​ចាស់​បុរាណ​នានា​ទទួល​បាន​ការអភិវឌ្ឍ និងអភិរក្ស និងជំរុញប្រែក្លាយវត្តជារមណីយដ្ឋានទេសចរណ៍សាសនា ទាក់​ទាញ​ទេសចរចូលទស្សនាផងដែរ។

សម្ដេចវិបុលសេនាភក្តី សាយ ឈុំ មានប្រសាសន៍ថា នៅក្នុង​អង្គ​មហាសន្និបាត​រយៈពេល២​ថ្ងៃ​នេះ​ តំណាងមន្ត្រីសង្ឈ នឹងធ្វើកិច្ចពិភាក្សា ដោយបញ្ញាស្មារតី និងបទពិសោធន៍ ដើម្បី​រក​ឱ្យ​ឃើញ​នូវ​ចំណុច​ខ្លាំង ចំណុចខ្សោយ បញ្ហាប្រឈម និងកាលានុវត្តភាព សម្រាប់​ការ​អនុវត្ត​សង្ឃ​ប្រកាស​នា​ពេល​កន្លងមក និងដើម្បី​សម្រេច​ឱ្យ​បាន​តាម​មូល​បទ​នៃ​អនុ​សំវច្ឆរ​មហា​សន្និបាត​មន្ត្រី​សង្ឃ​ទូទាំង​ប្រទេស លើកទី៣១នេះ សំដៅពង្រឹងពង្រីករចនាសម្ព័ន្ធគ្រប់គ្រងនិងដឹកនាំព្រះសង្ឃ ការងារ​គ្រប់គ្រងវត្តអារាម ការងារពុទ្ធិកសិក្សា ការងារផ្សព្វផ្សាយព្រះធម៌ព្រះវិន័យ ក៏ដូចជា​ការ​ចូល​រួម​ចំណែកអនុវត្តកម្មវិធីនយោបាយ យុទ្ធសាស្រ្តបញ្ជកោណ-ដំណាក់កាលទី ១ របស់​រាជ​រដ្ឋាភិបាល នីតិកាលទី ៧ នៃរដ្ឋសភា បន្តរីកចំម្រើន។

ឯកឧត្តម ចាយ បូរិន រដ្ឋមន្ត្រី ក្រសួងធម្មការនិងសាសនា ថ្លែងថា នៅក្នុងអង្គមហាសន្និបាត​មន្ត្រី​ទូទាំង​ប្រទេស លើកទី៣១ ក្រសួងបាននិងកំពុងជម្រុញឱ្យអ្នកពាក់ពន្ធ័ ចូលរួមចំណែក ជាមួយ​រាជ​រដ្ឋាភិបាល ក្នុងការរៀបចំទីវត្តអារាម ឱ្យក្លាយទៅជាតំបន់មរណីយដ្ឋាន ទេសចរណ៍សាសនា ដោយ​មាន​ការគ្រប់គ្រងល្អ មានបរិស្ថានល្អ ដើម្បីទាក់ទាញ ភ្ញៀវទេសចរជាតិ អន្តរជាតិ ចូល​ទស្សនា​សិក្សា​ឈ្វេងយល់ពីប្រពៃណី ទំនៀម ទម្លាប់ អត្តសញ្ញាណជាតិ និង​ភាព​រីក​ចម្រើន​ក្នុង​សង្គម តាមរយៈព្រះពុទ្ធសាសនា។

សូមបញ្ជាក់ថា ក្រោមដំបូលសន្តិភាពបច្ចុប្បន្ន ទូទាំងប្រទេស មាន វត្តអារាម​ព្រះពុទ្ធ​សាសនា​សរុប​ចំនួន ៥ ១៣៣វត្ត ក្នុងនោះ វត្តមហានិកាយ មាន ៤ ៨៦៦ និងវត្តធម្មយុត្តិកនិកាយមាន ២៦៧​វត្ត និងមានព្រះសង្ឃសរុបចំនួន៦ម៉ឺន៨៩៦៧អង្គ ក្នុងព្រះសង្ឈមហានិកាយ មាន ៦ម៉ឺន៦ ៦០៩​អង្គ និងព្រះសង្ឈធម្មយុត្តិកនិកាយ ២ ៣៥៨ អង្គអាចារ្យ អាចារិនី៕ អត្ថបទ៖ ស៊ុម សុខជា