ចាប់តាំងពីសង្រ្គាមនៅតំបន់ហ្កាហ្សា បានចាប់ផ្តើមមក ប្រតិបត្តិការយោធារបស់អ៊ីស្រាអែលនៅតំបន់កាន់កាប់ វេស បែង (West Bank) កាន់តែញឹកញាប់ និងកាន់តែមានខ្លាំងក្លា។ ទីក្រុង ជេនីន (Jenin) ភាគខាងជើង ដែលជាចំណុចកណ្តាលនៃការវាយឆ្មក់ទាំងនេះមុនពេលការវាយប្រហាររបស់ក្រុមហាម៉ាស ឥឡូវនេះបានក្លាយជាសមរភូមិប្រចាំសប្តាហ៍។

ក្មេងជំទង់ប៉ាឡេស្ទីនជាច្រើន ដែលកំពុងរត់ចេញពីការបបង្រ្កាបរបស់កងទ័ពនៅទីនោះ បានចំអកប្រធានាធិបតីប៉ាឡេស្ទីន និងការអំពាវនាវរបស់លោកទៅកាន់ពិភពលោកសម្រាប់ការការពារប្រឆាំងនឹងការកាន់កាប់របស់អ៊ីស្រាអែល។

ចាប់តាំងពីការវាយប្រហាររបស់ក្រុមហាម៉ាស ការគាំទ្រសម្រាប់ការតស៊ូប្រដាប់អាវុធបានកើនឡើងនៅក្នុងផ្នែកជាច្រើននៃតំបន់ វេស បែង ដូចជានៅទីក្រុង ណាបលឺស (Nablus) និងទីក្រុង ជេនីន (Jenin)។

អ្នកស្រុកខ្លះបាននិយាយថា ពួកគេមានការគោរពតិចតួចចំពោះប្រធានាធិបតីប៉ាឡេស្ទីន លោក ម៉ាសម៉ូដ អាបបាស (Mahmoud Abbas) ប៉ុន្តែគោរពយ៉ាងខ្លាំងចំពោះអ្នកនាំពាក្យយោធាហាម៉ាស លោក អាប៊ូ អូបៃដា (Abu Obeida) ពីព្រោះលោកជាអ្នកការពារប៉ាឡេស្ទីន។

ការស្ទង់មតិដែលបានធ្វើឡើងនៅចន្លោះថ្ងៃទី២២ ខែវិច្ឆិកា ដល់ថ្ងៃទី០២ ខែធ្នូ ដោយក្រុមគិតគូរប៉ាឡេស្ទីន ដែលជាមជ្ឈមណ្ឌលប៉ាឡេស្ទីនសម្រាប់គោលនយោបាយ និងការស្រាវជ្រាវស្ទង់មតិ (PSR) បានរកឃើញថាការគាំទ្រសម្រាប់ក្រុមហាម៉ាស មានច្រើនជាងបីដងនៅក្នុងតំបន់វេស បែង បើធៀបនឹងរយៈពេលបីខែមុន។

អ្នកគាំទ្រក្រុមហាម៉ាស នៅតែស្ថិតក្នុងពលរដ្ឋភាគតិចនៅឡើយ ប៉ុន្តែអ្នកឆ្លើយតបចំនួន ៧០% បាននិយាយថា ការតស៊ូប្រដាប់អាវុធគឺជាមធ្យោបាយដ៏ល្អបំផុតក្នុងការបញ្ចប់ការកាន់កាប់របស់អ៊ីស្រាអែល៕