ក្រុមហ៊ុន តេស្លា (Tesla) កំពុងប្រមូលរថយន្តអគ្គិសនីរបស់ខ្លួនជាងពីរលានគ្រឿងនៅក្នុងសហរដ្ឋអាមេរិកមកវិញ ដើម្បីដំឡើងប្រព័ន្ធការពារថ្មីសម្រាប់ប្រព័ន្ធជំនួយអ្នកបើកបរស្វ័យប្រវត្តិកម្រិតខ្ពស់របស់ខ្លួន បន្ទាប់ពីមានការព្រួយបារម្ភពីរដ្ឋបាលសុវត្ថិភាពចរាចរណ៍ផ្លូវហាយវេជាតិ (NHTSA) អំពីលទ្ធភាពនៃកំហុសឆ្គងក្នុងការប្រើប្រាស់។

រដ្ឋបាលសុវត្ថិភាពចរាចរណ៍ NHTSA ដែលបានស៊ើបអង្កេតក្រុមហ៊ុន តេស្លា អស់រយៈពេលជាង ២ឆ្នាំមកនេះ បានចោទសួរថាតើប្រព័ន្ធនេះធានាបានគ្រប់គ្រាន់នូវសុវត្ថិភាព និងការចូលរួមរបស់អ្នកបើកបរដែរឬទេ។

ក្រុមហ៊ុន តេស្លា បានទទួលស្គាល់នៅក្នុងឯកសារប្រមូលមកវិញថា ការគ្រប់គ្រងប្រព័ន្ធបើកបរស្វ័យប្រវត្តិបច្ចុប្បន្ន «ប្រហែលជាមិនគ្រប់គ្រាន់ក្នុងការទប់ស្កាត់កំហុសឆ្គងនៃការប្រើប្រាស់របស់អ្នកបើកបរឡើយ» ដែលអាចបង្កើនហានិភ័យនៃការបង្កគ្រោះថ្នាក់ ប៉ុន្តែមិនយល់ស្របនឹងការវិភាគរបស់និយ័តករឡើយ។

ដើម្បីដោះស្រាយកង្វល់ទាំងនេះ ក្រុមហ៊ុន តេស្លា គ្រោងនឹងដាក់បញ្ជូលបច្ចុប្បន្នភាពកម្មវិធីលើប្រព័ន្ធខ្លួនដើម្បី «បញ្ចូលការត្រួតពិនិត្យ និងការជូនដំណឹងបន្ថែម» នៅក្នុងរថយន្តដែលរងផលប៉ះពាល់។

គោលបំណងគឺដើម្បីពង្រឹងទំនួលខុសត្រូវជាបន្តរបស់អ្នកបើកបរនៅពេលភ្ជាប់មុខងារបើកបរស្វ័យប្រវត្តិ។ ទោះជាយ៉ាងណាក៏ដោយ ក្រុមហ៊ុន តេស្លា មិនបានធ្វើអត្ថាធិប្បាយថាតើការប្រមូលមកវិញនោះនឹងត្រូវធ្វើឡើងនៅខាងក្រៅសហរដ្ឋអាមេរិក ដែរឬយ៉ាងណានោះទេ៕