ការិយាល័យព្យាករណ៍អាកាសធាតុបាននិយាយថា ទីក្រុងប៉េកាំង ត្រូវបានគ្របដណ្តប់ដោយព្រិលធ្លាក់នៅថ្ងៃព្រហស្បតិ៍នេះ ខណៈអាកាសធាតុត្រជាក់ខ្លាំងបានគ្របដណ្តប់តំបន់ធំៗរបស់ប្រទេសចិន ដោយ ការធ្លាក់ចុះសីតុណ្ហភាព ត្រូវបានរំពឹងទុកក្នុងរយៈពេលប៉ុន្មានថ្ងៃខាងមុខនេះ។

ដោយសាលារៀនត្រូវបានផ្អាក ឬដំណើរការតាមអ៊ីនធឺណិត កុមារជាច្រើនត្រូវបានគេមើលឃើញកំពុងសប្បាយរីករាយជាមួយការលេងបាល់ព្រិលនៅតាមដងផ្លូវ ខណៈកម្មករនៅទីក្រុង បានមកសម្អាតផ្លូវដែលគ្របដណ្តប់ដោយព្រិលក្រាស់។

ព្រិលកំពុងកើនឡើងចាប់តាំងពីថ្ងៃចន្ទ ទី១១ ខែធ្នូ ក្នុងរដ្ឋធានីដែលមានប្រជាជនជិត ២២ លាននាក់។ សីតុណ្ហភាព ត្រូវបានគេរំពឹងថានឹងធ្លាក់ចុះបន្ថែមទៀតដល់ដក ១២អង្សាសេនៅថ្ងៃសុក្រ ពីប្រហែលដក ៣អង្សាសេ នៅថ្ងៃព្រហស្បតិ៍នេះ។

តារាងអាកាសធាតុ និងផែនទី នៅលើបណ្តាញផ្សព្វផ្សាយសង្គម បានបង្ហាញពីអាកាសធាតុកាន់តែធ្លាក់ចុះទាបឆាប់រហ័សនៅភាគខាងត្បូងប្រទេសចិន ដោយសីតុណ្ហភាពនៅទូទាំងខេត្តមួយចំនួន ធ្លាក់ចុះដល់ក្រោម ១៤អង្សាសេ ឬក្រោម២០អង្សាសេ នៅចុងសប្តាហ៍នេះ។