ប្រធានទីភ្នាក់ងារជនភៀសខ្លួនប៉ាឡេស្ទីនរបស់អង្គការសហប្រជាជាតិ (UNRWA) កាលពីថ្ងៃពុធ (ទី១៣ ខែធ្នូ) បានរិះគន់ចំពោះវិធានការរបស់ប្រទេសស្វីស ក្នុងការកាត់បន្ថយជំនួយ ខណៈដែលតំបន់ហ្កាហ្សាស្ទ្រីបប្រឈមនឹងវិបត្តិមនុស្សធម៌ ដែលត្រូវបានអង្គការសហប្រជាជាតិពិពណ៌នាថា ជាមហន្តរាយធ្ងន់ធ្ងរ។

ដោយថ្លែងនៅឯវេទិកាជនភៀសខ្លួនសកល ក្នុងទីក្រុងហ្សឺណែវ ប្រទេសស្វីស នៅថ្ងៃពុធនោះ ប្រធាន UNRWA លោក Philippe Lazzarini បានរិះគន់ចំពោះ «ការផ្ដល់មូលនិធិមិនគ្រប់គ្រាន់ជាយូរមកហើយ»របស់ទីភ្នាក់ងារ ពោលគឺ ១ថ្ងៃបន្ទាប់ពីលោកបានសម្តែងការខកចិត្ត ចំពោះគំនិតផ្តួចផ្តើមរបស់ស្វីស។

ក្រុមប្រឹក្សាជាតិរបស់ស្វីស ដែលជាសភាជាន់ទាបនៃសភាសហព័ន្ធ បានអនុម័តកាត់បន្ថយការផ្ដល់ជំនួយប្រចាំឆ្នាំចំនួន ២០លានហ្វ្រង់ស្វីស (២២,៨៣លានដុល្លារ) ដល់ទីភ្នាក់ងារនេះ ដោយទទួលបានសំឡេងគាំទ្រ ១១៦ ទល់នឹង ៧៨ កាលពីថ្ងៃចន្ទដើមសប្ដាហ៍នេះ។ អ្នកសេរសេរគំនិតផ្តួចផ្តើមនេះ ដែលជាផ្នែកមួយនៃគណៈប្រតិភូសភា ដែលបានធ្វើទស្សនកិច្ចនៅ UNRWA កាលពីដើមឆ្នាំនេះ បានលើកហេតុផលថា ទីភ្នាក់ងារនេះខ្វះអព្យាក្រឹតភាព។

សភាជាន់ខ្ពស់គ្រោងនឹងវាយតម្លៃគំនិតផ្តួចផ្តើមនេះ នៅថ្ងៃព្រហស្បតិ៍ (ទី១៤ ខែធ្នូ) នេះ។ សភាទាំង២ ត្រូវតែអនុម័ត ដើម្បីឲ្យសំណើនេះចូលជាធរមាន។

លោក Lazzarini ដែលកាលពីខែមុនបាននិយាយដោយមានជំនឿថា មានការប៉ុនប៉ងដោយចេតនា ដើម្បីរារាំងដល់ប្រតិបត្តិការរបស់ UNRWA នោះ បានប្រាប់ថា សមត្ថភាពរបស់ទីភ្នាក់ងារ ក្នុងការធ្វើការងាររបស់ខ្លួន នៅក្នុងតំបន់ហ៊ុមព័ទ្ធប៉ាឡេស្ទីននេះ គឺជិតដួលរលំហើយ៕