ភ្នំពេញ ៖ អភិបាលរាជធានីភ្នំពេញ និងឯកអគ្គរដ្ឋទូតវិសាមញ្ញឥណ្ឌូនេស៊ី បានជួបពិភាក្សាការងារមួយចំនួ និងជំរុញការចងសម្ព័ន្ធមេត្រី។

​ឯកឧត្តម ឃួង ស្រេង អភិបាលរាជធានីភ្នំពេញ និងឯកឧត្តម សាន់តូ ជាម៉ូស៊ូម៉ាតូ ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋឥណ្ឌូនេស៊ី ប្រចាំព្រះរាជាណាចក្រកម្ពុជា បានជូបសម្តែងការគួរសមរវាងគ្នានារសៀលថ្ងៃទី១៤ ខែធ្នូ ឆ្នាំ២០២៣ នៅសាលារាជធានីភ្នំពេញ។

នាជំនួបនោះ ឯកឧត្តម ឃួង ស្រេង បានជម្រាបជូនភាគីឥណ្ឌូនេស៊ីថា ការអភិវឌ្ឍរីកចម្រើនរបស់កម្ពុជា គឺពិតជាបានមកពីការរួមចំណែកស្វែងរកសន្និភាពពីសំណាក់ឥស្សរជនកំពូលៗរបស់សាធារណរដ្ឋឥណ្ឌូនេស៊ី ក្នុងនោះគឺមានឯកឧត្ដម ស៊ូកាណូ និងឯកឧត្ដម អាលី អាឡាតាស់ ហើយដើម្បីតបស្នងសងគុណចំពោះឥស្សរជនទាំងពីរ សម្ដេចតេជោ ហ៊ុន សែន បានប្រសិទ្ធនាមផ្លូវចំនួន ២ខ្សែ តភ្ជាប់ពីផ្លូវជាតិលេខ៦ រហូតដល់មហាវិថីឈ្នះ-ឈ្នះ ស្ថិតនៅខណ្ឌជ្រោយចង្វារ រាជធានីភ្នំពេញជាឈ្មោះរបស់លោក ដែលខ្សែទី១ ផ្លូវបេតុងអាម៉េប្រវែង ៦ ២០១ម៉ែត្រ ទទឹងប្រវែង ១៥ម៉ែត្រ ចាប់ពីផ្លូវជាតិលេខ៦ រហូតដល់គល់ស្ពាន ព្រែកព្នៅ ជា មហាវិថី ស៊ូកាណូ និងខ្សែទី២ ផ្លូវបេតុងអាម៉េប្រវែង ៥ ៣៥៤ម៉ែត្រ ទទឹងប្រវែង ១៥ម៉ែត្រ ចាប់ពីផ្លូវខ្សែទី១ ក្បែរទីតាំងស្ពានព្រែកតាសេក រហូតដល់រង្វង់មូលមហាវិថីឈ្នះ-ឈ្នះ ជា មហាវិថី អាលី អាឡាតាស់ ដែលឈ្មោះផ្លូវទាំងពីរខ្សែនេះនឹងសម្ពោធជាផ្លូវការនៅពេលខាងមុខនេះ។

ឯកឧត្តម ឃួង ស្រេង បន្ថែមថា រដ្ឋបាលរាជធានីភ្នំពេញ និងសហការជាមួយស្ថានទូតឥណ្ឌូនេស៊ីប្រចាំនៅព្រះរាជាណាចក្រកម្ពុជា ដោយរក្សាសន្តិសុខជូនស្ថានទូតឱ្យបានល្អ នឹងការរៀបចំសណ្ដាប់ធ្នាប់អនាម័យបរិស្ថាន ជាមួយនឹងការជួសជុលហេដ្ឋារចនាសម្ព័ន្ធនៅជុំវិញស្ថានទូតទៅតាមការស្នើឡើងរបស់ឯកឧត្ដម សាន់តូ ជាម៉ូស៊ូម៉ាតូ។

ឯកឧត្ដម សាន់តូ ជាម៉ូស៊ូម៉ាតូ បានថ្លែងការអរគុណចំពោះរដ្ឋបាលរាជធានីភ្នំពេញដែលបានជួយសម្រួលប្រតិភូ ក្នុងការរៀបចំវេទិកាអភិបាលក្រុងអាស៊ាន និងកិច្ចប្រជុំអភិបាលរាជធានីភ្នំពេញ និងរដ្ឋធានីអាស៊ាន ក្រោមប្រធានបទ ការពង្រឹងកិច្ចសហការអាស៊ាន តាមរយៈការជំរុញ ការកសាងទីក្រុងឆ្លាតមានភាពធន់ និងមានចីរភាព ប្រកបដោយបរិវត្តកម្ម និងបរិយាប័ន្ន តាមគន្លងប្រក្រតីភាពថ្មី កាលពីថ្ងៃទី០២ ទី០៣ ខែធ្នូ ឆ្នាំ២០២៣ នៅសណ្ឋាគារ សុខា ភ្នំពេញ។ ឯកឧត្ដម ក៏បានស្នើសុំឱ្យរដ្ឋបាលរាជធានីភ្នំពេញ ជួយការពារពលរដ្ឋឥណ្ឌូនេស៊ីនៅរាជធានីភ្នំពេញជាង ២០០០នាក់ ដែលគ្រោងនឹងបោះឆ្នោតសកលនៅខែកុម្ភៈខាងមុខនេះ និងជំរុញឱ្យការចុះ MOU ជាទីក្រុងសម្ព័ន្ធមេត្រី រវាងរដ្ឋធានីរាជធានីភ្នំពេញ និងកោះសូម៉ាត្រាឱ្យបានលឿន៕ អត្ថបទ ៖ ប្រាក់ វ៉ាន់ដា