ប្រធានាធិបតីចិន លោក ស៊ី ជីនពីង (Xi Jinping) បាននិយាយកាលពីខែមុនថា ដំណោះស្រាយរដ្ឋ២ គឺជាមធ្យោបាយដ៏សំខាន់ជាមូលដ្ឋាន ដើម្បីចេញពី «វដ្តនៃជម្លោះ» រវាងអ៊ីស្រាអែល និងប៉ាឡេស្ទីន។

ការលើកឡើងរបស់លោក ស៊ី បែបនេះ ដែលត្រូវធ្វើឡើងក្នុងអំឡុងកិច្ចប្រជុំកំពូល BRICS តាមរយៈវីដេអូអនឡាញស្តីពីសង្រ្គាមអ៊ីស្រាអែល-ហ្កហ្សា កាលពីខែមុន បានរំលឹកឡើងវិញនូវជំហររបស់ប្រទេសចិនដែលប្រកាន់ខ្ជាប់ជាយូរមកហើយថា ប៉ាឡេស្ទីនគួរតែក្លាយជារដ្ឋឯករាជ្យ ហើយប្រជាជនរបស់ប្រទេសនេះ គួរតែទទួលបានសិទ្ធិនៃ «ភាពជាប្រជាជាតិមួយ ជីវិត និងការវិលត្រឡប់មកវិញ»។

ខណៈភ្លើងសង្រ្គាម ដែលបានឆក់យកជីវិតមនុស្សជាង ១៤.០០០នាក់រួចហើយនោះ បានឈានចូលដល់ខែទី២ មេដឹកនាំលោកខាងលិចកាន់តែច្រើន បានសម្តែងការគាំទ្រ ចំពោះដំណោះស្រាយរដ្ឋ២ នេះ ដោយក្នុងនោះរួមមានទាំងប្រធានាធិបតីសហរដ្ឋអាមេរិក លោក Joe Biden ប្រធានាធិបតីបារាំង លោក Emmanuel Macron និងនាយករដ្ឋមន្ត្រីអង់គ្លេសលោក Rishi Sunak ផងដែរ។

អំឡុងពេលធ្វើសន្និសីទសារព័ត៌មាន បន្ទាប់ពីជួបលោក ស៊ី នៅទីក្រុង San Francisco ក្នុងខែវិច្ឆិកា លោក Biden បាននិយាយថា៖ «ខ្ញុំបានបញ្ជាក់យ៉ាងច្បាស់ដល់ប្រជាជនអ៊ីស្រាអែលថា ចម្លើយចុងក្រោយតែមួយគត់នៅទីនេះ គឺជាដំណោះស្រាយរដ្ឋ២»។

ក្រុមអ្នកសង្កេតការណ៍ការទូត បាននិយាយថា ការគាំទ្រជាថ្មី សម្រាប់ដំណោះស្រាយរដ្ឋ២ នេះ បានបង្ហាញថា ការប៉ុនប៉ង ដើម្បីឲ្យរក្សាស្ថានភាពដដែល នៅក្នុងជម្លោះអ៊ីស្រាអែល និងប៉ាឡេស្ទីន បានបែកខ្ញែកគ្នា។ ប៉ុន្តែបណ្ដាអ្នកសង្កេតទាំងនោះ បានលើកឡើងថា វានៅមិនទាន់ច្បាស់ទេថា តើទីក្រុងប៉េកាំង ដែលជាអ្នកសម្របសម្រួលដ៏មានឥទ្ធិពល នៅមជ្ឈិមបូព៌ា និងជាអ្នកគាំទ្រដ៏យូរនៃដំណោះស្រាយរដ្ឋ២ អាចដើរតួនាទីដ៏សំខាន់នៅក្នុងដំណើរការសន្តិភាពនេះ ឬយ៉ាងណា៕