ប្រធានាធិបតីរុស្សី លោក វ្ល៉ាឌីមៀរ ពូទីន នៅថ្ងៃព្រហស្បតិ៍ (ទី១៤ ខែធ្នូ) នេះ បាននិយាយថា រុស្ស៊ីនឹងបន្តធ្វើសង្គ្រាមនៅអ៊ុយក្រែនរហូត ប្រសិនបើទីក្រុងគីវ មិនបានរកវិធីដោះស្រាយ ដែលយកកង្វល់អំពីសន្តិសុខរបស់ទីក្រុងម៉ូស្គូមកពិចារណា ដោយបន្ថែមថា គោលដៅនៃ «ប្រតិបត្តិការយោធាពិសេស» នេះ នឹងត្រូវតែសម្រេចបាន មិនថាករណីណាក៏ដោយ។

ដោយឆ្លើយតបនឹងសំណួរពីសាធារណជន និងប្រព័ន្ធផ្សព្វផ្សាយ នៅក្នុងព្រឹត្តិការណ៍ ដែលគ្របដណ្តប់ដោយសង្រ្គាម លោក ពូទីន ដែលបានប្រកាសថា លោកនឹងស្វែងរកអាណត្តិប្រធានាធិបតីរយៈពេល ៦ឆ្នាំទៀត នៅក្នុងខែមីនានោះ បាននិយាយថា គោលដៅដើមរបស់លោក នៅអ៊ុយក្រែន មិនផ្លាស់ប្តូរទេ ហើយថា កងកម្លាំងរុស្ស៊ី កំពុងមានជំហរកាន់តែរឹងមាំឡើង នៅតាមខ្សែត្រៀមជួរមុខភាគច្រើន។

មេដឹកនាំចាស់វស្សាវ័យ ៧១ឆ្នាំរូបនេះ បាននិយាយថា គោលដៅស្នូលរបស់រុស្ស៊ី នៅតែជា «ការកម្ទេចពួកណាហ្ស៊ីនិយម» «ការធ្វើឲ្យតំបន់គ្មានកម្លាំងយោធា» និងធានាឲ្យបាននូវអព្យាក្រឹតភាពរបស់អ៊ុយក្រែន។

ជាមួយគ្នានេះ លោក ពូទីន បាននិយាយថា លោកបានឃើញពីសញ្ញា ដែលបង្ហាញថា ប្រយោជន៍របស់លោកខាងលិច សម្រាប់ការផ្តល់ជំនួយផ្នែកយោធា និងហិរញ្ញវត្ថុដល់អ៊ុយក្រែន ជាអ្វី ដែលលោកហៅថា «អំណោយឥតប្រយោជន៍» ដែលអាចនឹងអស់ កំពុងធ្លាក់ចុះ ប៉ុន្តែថា សម្រាប់ពេលនេះ លោកជឿថា ទីក្រុងគីវ នឹងបន្តទទួលបានជំនួយបន្ថែមទៀត៕