កំពង់ធំ : គម្រោងការងារថែទាំផ្លូវជាប្រចាំ ក្រាលកៅស៊ូពីរស្រទាប់ DBST ចំនួន ៤ ខ្សែ ប្រវែងសរុបជាង ១១៣ គីឡូម៉ែត្រ ស្ថិតក្នុងស្រុកចំនួន ៦ ក្នុងខេត្តកំពង់ធំ ត្រូវបានសមាជិកគណៈកម្មាធិការលទ្ធកម្ម បានឯកភាព និងទទួលយកលទ្ធផលសម្រេចដំណាក់កាលចុងក្រោយ។

ឯកឧត្តម សាន វិសាល រដ្ឋលេខាធិការក្រសួងអភិវឌ្ឍន៍ជនបទ និងជាសមាជិកគណៈកម្មាធិការលទ្ធកម្ម នៅថ្ងៃទី ១៤ ខែ ធ្នូ ឆ្នាំ ២០២៣ នេះ បានដឹកនាំក្រុមការងារអន្តរក្រសួង ចុះត្រួតពិនិត្យ និងវាយតម្លៃដំណាក់កាលចុងក្រោយ លើការងារថែទាំផ្លូវជាប្រចាំ, ក្រាលកៅស៊ូពីរស្រទាប់ DBST ចំនួន ០៤ ខ្សែ, ប្រវែងសរុបជាង ១១៣ គីឡូម៉ែត្រ, ទទឹងខ្នងលើ ៥ ម៉ែត្រ និង ៦ ម៉ែត្រ, និងបំពាក់ ស្លាកសញ្ញាចរាចរណ៏ចំនួន ៣៦៥ ស្លាក ស្ថិតនៅក្នុងឃុំចំនួន ២០ ក្នុងស្រុកប្រាសាទសំបូរ, ស្រុកសណ្តាន់, ស្រុកបារាយណ៍, ស្រុក កំពង់ស្វាយ, ស្រុកប្រសាទបល្ល័ង្គ, និងស្រុកស្ទោង នៅខេត្តកំពង់ធំ។

ជុំវិញការងារថែទាំផ្លូវនេះ, ឯកឧត្តម បានសំណូមពរដល់អ្នកទទួលការ ខិតខំប្រឹងប្រែង ធ្វើយ៉ាងណាឲ្យការងារថែទាំផ្លូវជា ប្រចាំ អនុវត្តឲ្យបានល្អទៅតាមផែនការ និងប្រកបដោយគុណភាពខ្ពស់ ដើម្បីឲ្យប្រជាពលរដ្ឋងាយស្រួលក្នុងការធ្វើដំណើរទៅមក ក៏ ដូចជាការដឹកជញ្ជូនផលិតផលកសិកម្ម កសិឧស្សាហកម្ម ពិសេសការធ្វើដំណើររបស់សិស្សានុសិស្សទៅរៀនសូត្រ និងការដឹកអ្នកជម្ងឺ មកកាន់មណ្ឌលសុខភាពបានទាន់ពេលវេលាជាដើម ។

ទាក់ទិនការងារថែទាំផ្លូវជាប្រចាំនេះ អ្នកទទួលការ, បានខិតខំបំពេញការងារសម្រេចបានលទ្ធផលជាផ្លែផ្កាដូចជា៖ ការងារ បំពេញដីតាមជើងទេរសងខាងផ្លូវ, ការកៀរចិញ្ចើមនិងថែមគ្រួសក្រហមសងខាងផ្លូវ, លុបក្រលុកសំបុរមាន់, ការស្រោចកៅស៊ូមួយជាន់ និងស្រោចកៅស៊ូពីរជាន់លើផ្ទៃផ្លូវប្រេះ, ការងារជួសជុលតម្រង់គែមកម្រាលផ្លូវដោយគ្រឹះថ្មមិច, ការងារសម្អាតលូ កាត់ស្មៅ និងឆ្ការព្រៃ តាមសងខាងផ្លូវ និងការងារបំពាក់ស្លាកសញ្ញាចរាចរណ៍ជាដើម ដោយគម្រោងទាំងអស់នេះសម្រេចបាន ១០០ ភាគរយ។

សូមបញ្ជាក់ថា ការងារថែទាំផ្លូវជាប្រចាំ ក្រាលកៅស៊ូពីរស្រទាប់ DBST ចំនួន ៤ ខ្សែខាងលើនេះ, បានអនុវត្តដោយនាយកដ្ឋាន ផ្លូវលំ ជនបទ នៃក្រសួងអភិវឌ្ឍន៍ជនបទ គឺអនុវត្តសម្រេចដំណាក់កាលចុងក្រោយ និងត្រឹមត្រូវតាមការកំណត់ ក្នុងបទដ្ឋានបច្ចេកទេស ទាំងស្រុង៕

អត្ថបទ៖ សុន រ៉ាឌី