ក្រសួងពាណិជ្ជកម្មកម្ពុជានៅថ្ងៃទី១៥ ខែធ្នូ ឆ្នាំ២០២៣នេះ បានបើកសម្ពោធជាផ្លូវការ ការរៀបចំ​ពិព័រណ៍​ផលិតផលខ្មែរ និងទំនិញនាំចេញ-នាំចូលលើកទី១៦ ក្រោមអធិបតី ឯកឧត្តម កឹម ស៊ីថន រដ្ឋមន្រ្តី​ស្តីទីក្រ​សួងពាណិជ្ជកម្ម និងមានការអញ្ញើញចូលរួមពីឯកអគ្គរាជទូត អគ្គរដ្ឋទូតចំនួន ១១ ប្រទេស , តំណាងលេខាធិការដ្ឋានពិព័រណ៍ចិន-អាស៊ាន, ប្រតិភូពាណិជ្ជករ​មក​ពី​បណ្តា​ប្រទេស​ផ្សេង​ៗ និងភ្ញៀវជាតិ អន្តរជាតិជាច្រើនរូបផងដែរ។

ពិព័រណ៍នេះប្រព្រឹត្តទៅរយៈពេល ៤ថ្ងៃ ចាប់ពីថ្ងៃទី១៥ ដល់១៨ ខែធ្នូ ឆ្នាំ២០២៣ ក្នុង​គោល​បំណង​លើក​កម្ពស់សកម្មភាពពាណិជ្ជកម្ម និងវិនិយោគនៅកម្ពុជា ជាពិសេស ដើម្បី​ជំរុញ​ការ​តភ្ជាប់​ទំនាក់​ទំនងពាណិជ្ជកម្ម រវាងកម្ពុជា និងសហគមអន្តរជាតិ។

ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម បានឲ្យដឹងថា ពិព័រណ៍ផលិតផលខ្មែរ និង​ទំនិញនាំចេញ-នាំចូល បានរៀបចំឡើងជាលើកដំបូងនៅឆ្នាំ២០០៦ រហូត​មក​ដល់​ឆ្នាំ​២០២៣​នេះ មានរយៈពេលចំនួន ១៨ឆ្នាំ ប៉ុន្តែត្រូវបានខកខានចំនួន ២ឆ្នាំជាប់គ្នា គឺឆ្នាំ២០២០ និង​២០២១ ដោយសារការកើតឡើងនូវជំងឺកូវីដ-១៩។ ក្នុងការចាប់ផ្តើមរៀបចំជាលើកដំបូង មាន​ស្តង់ចំនួន ១០៥ ស្តង់ និងមានអ្នកចូលមកទស្សនាប្រមាណជាង ១៦,០០០នាក់។

ឯកឧត្តម កឹម ស៊ីថន មានប្រសាសន៍ថា ព្រឹត្តិការណ៍នេះ​បាន​រួម​ចំណែក​ជួយ​ផ្សព្វ​ផ្សាយ​ពី​សភាព​ការណ៍​ពិត​ជាក់ស្ដែង នៃសង្គមកម្ពុជានាពេលបច្ចុប្បន្ន និងបង្ហាញពីបរិយាកាសធុរកិច្ច វិនិយោគ និង​ការ​រីក​ចម្រើនលើគ្រប់វិស័យរបស់កម្ពុជា ជាពិសេស​បាន​រួម​ចំណែក​អនុវត្ត​គោល​នយោបាយ​វិត្ថារកម្ម​របស់រាជរដ្ឋាភិបាលពីមួយអាណត្តិ ទៅមួយអាណត្តិ សំដៅ​ជួយ​ជំរុញ​កំណើន​សេដ្ឋកិច្ច​ជាតិ ប្រកបដោយបរិយាបន្ន និងសមធម៌។

សូមបញ្ជាក់ថា ពិព័រណ៍ផលិតផលខ្មែរ និងទំនិញនាំចេញ-នាំចូល លើកទី១៦ មានក្រុមហ៊ុន សហគ្រាស​ចូលរួមចំនួន១៣៦ (ក្នុងស្រុក ៨៦) ស្តង់ចំនួន ២៣២ស្តង់ (ក្នុងស្រុកចំនួន ១៦៤​ស្តង់) និងមានការចូលរួម ១៧ប្រទេស រួមមាន អូស្រ្តាលី ចិន បារំាង មីយ៉ាន់ម៉ា កូរ៉េ ជប៉ុន ឡាវ ហ្វីលីពីន និងឥណ្ឌូនេស៊ី។ ផលិតផលផលដែលនឹងត្រូវដាក់តាំងបង្ហាញលក់ មានដូចជា៖ ផលិត​ផល​កសិកម្ម កសិ-ពាណិជ្ជកម្ម ផលិតផលសម្គាល់ភូមិសាស្រ្តទំនិញ (GI) រួមមាន ម្រេចកំពត ស្ករ​ត្នោតកំពង់ស្ពឺ ផ្កាអំបិលកំពត-កែប ក្រូចថ្លុងកោះទ្រង់ បង្កងតាកែវ ទឹកត្រីកំពត-កែប និងទឹក​ឃ្មុំ​ព្រៃ​មណ្ឌលគិរី អង្ករ ស្វាយចន្ទី ផលិតផលសូត្រ និងការកែច្នៃ ផលិតផលហាឡាលកម្ពុជា ផលិត​ផល​ម្រេចនិងគ្រឿងទេសកម្ពុជា គ្រឿងឧបភោគ-បរិភោគ ផលិតផលម្ហូបអាហារ និង​ភេសជ្ជៈ គ្រឿងសម្អាងនិងតុបតែងកាយ រថយន្តនិងគ្រឿងបន្លាស់ សម្ភារៈធ្វើដំណើរ គ្រឿង​អលង្ការ និង​ត្បូង​ថ្ម​មានតម្លៃ គ្រឿងអេឡិចត្រូនិក សម្លៀកបំពាក់និងស្បែកជើង វត្ថុអនុស្សាវរីយ៍ ទំនិញ​ប្រើប្រាស់ទូទៅមកពីបរទេស។ល៕ អត្ថបទ៖ ឈិត បូរ៉ាវី