លោកសាស្រ្តាចារ្យ ស៊ុន ចាន់ដឹប ប្រធានសិក្សាធិការដ្ឋាន នៃសាកលវិទ្យាល័យភូមិន្ទវិចិត្រសិល្បៈ នៃ​ក្រសួងវប្បធម៌ និងវិចិត្រសិល្បៈ ប្រាប់ BTV នាព្រឹកថ្ងៃទី១៥ ខែធ្នូ ឆ្នាំ២០២៣នេះថា គិត​ត្រឹម​ថ្ងៃ​នេះ សាកលវិទ្យាល័យភូមិន្ទវិចិត្រសិល្បៈ បានទទួលសិស្សប្រឡងជាប់ថ្នាក់ទី១២ថ្មីៗ មកចុះ​ឈ្មោះ​ចូល​សិក្សា មានចំនួន ៦៧៧ នាក់។

លោកសាស្រ្តាចារ្យ ស៊ុន ចាន់ដឹប បានឱ្យដឹងថា ក្នុងចំណោមសិស្សទាំង ៦៧៧ នាក់នេះ ក្នុង​នោះ​និសិ្សត​អាហារូបករណ៍ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន និង​សម្តេច​កិត្តិ​ព្រឹទ្ធ​បណ្ឌិត តាមរយៈសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ឆ្នាំសិក្សា២០២៣-២០២៤ ចំនួន ៦០ នាក់ និងក្រសួងអប់រំ យុវជន និងកីឡា ចំនួន ១១៥​នាក់ និងនិសិ្សតបង់ថ្លៃសិក្សា ចំនួន៥០២នាក់។

ឯកឧត្តមសាស្រ្តាចារ្យ ហេង សុផាឌី សាកលវិទ្យាធិការ នៃសាកលវិទ្យាល័យភូមិន្ទវិចិត្រសិល្បៈ បាន​លើក​ឡើងថា សាលារចនា ឬសាកលវិទ្យាល័យភូមិន្ទវិចិត្រសិល្បៈ សម្រេច​បាន​សមិទ្ធផល​ជា​ច្រើន​ក្នុង​វិស័យសិល្បៈ វប្បធម៌ខ្មែរ មានជាអាទិ៍ ចូលរួមចំណែកអភិរក្ស និងអភិវឌ្ឍវប្បធម៌ជាតិ ការងារ​ស្រាវជ្រាវ ការងារចងក្រងឯកសារ និងផ្សព្វផ្សាយវប្បធម៌ខ្មែរ ជាពិសេស​ការ​បណ្តុះ​បណ្តាល​ធន​ធានមនុស្សជាច្រើនពាន់នាក់ លើមុខជំនាញបុរាណវិទ្យា ស្ថាបត្យកម្ម និងនគរូបនីយ​វិទ្យា សិល្បៈសូនរូប តូរ្យតន្រី្ត និងសិល្បៈនាដសាស្រ្ត៕ អត្ថបទ រដ្ឋា