រដ្ឋមន្ត្រីក្រសួងរតនាគារសហរដ្ឋអាមេរិក លោកស្រី Janet Yellen និយាយថា សហរដ្ឋអាមេរិក គួរតែបន្តការសន្ទនាជាមួយប្រទេសចិន ដើម្បីទប់ស្កាត់ភាពតានតឹងរវាងប្រទេសទាំងពីរកុំឱ្យកើនឡើង។ លោកស្រី Yellen បានធ្វើអត្ថាធិប្បាយបែបនេះ នៅក្នុងព្រឹត្តិការណ៍មួយរៀបចំដោយក្រុមប្រឹក្សាធុរកិច្ចអាមេរិក-ចិន នៅទីក្រុងវ៉ាស៊ីនតោន កាលពីថ្ងៃព្រហស្បតិ៍។

លោកស្រីនិយាយថា សហរដ្ឋអាមេរិក មានបំណងបន្តគ្រប់គ្រងទំនាក់ទំនងសេដ្ឋកិច្ចទ្វេភាគីរវាងសហរដ្ឋអាមេរិក និងចិន ដោយការទទួលខុសត្រូវ។ លោកស្រី បន្តថា វាជាការចាំបាច់ នៅពេលដែលប្រទេសទាំងពីរមិនចុះសម្រុងគ្នា ឬនៅពេលមានភាពរង្គោះរង្គើរកើតឡើង គឺត្រូវការពារការយល់ច្រឡំដែលនាំឱ្យជម្លោះរីកធំ និងបង្កឱ្យមានផលប៉ះពាល់ច្រើន។

លោកស្រី និយាយថា លោកស្រីនឹងបន្តប្រើប្រាស់ក្រុមការងារសហរដ្ឋអាមេរិកនិងចិន លើបញ្ហាសេដ្ឋកិច្ចនិងហិរញ្ញវត្ថុ ដែលរដ្ឋាភិបាលទាំងពីរបានបង្កើតឡើងក្នុងឆ្នាំនេះ។ លោកស្រីមានផែនការ ធ្វើដំណើរទស្សនកិច្ចជាលើកទីពីរទៅកាន់ប្រទេសចិននៅឆ្នាំក្រោយ។

លោកស្រី Yellen ក៏បាននិយាយយោងទៅរកទីផ្សារអចលនទ្រព្យដែលរីកចម្រើនខ្សោយនៅក្នុងប្រទេសចិន ដែលធ្វើឱ្យបំណុលគ្រប់គ្រងដោយរដ្ឋាភិបាលក្នុងតំបន់កើនឡើង។ សហរដ្ឋអាមេរិកនឹងបញ្ជាក់ពីភាពច្បាស់លាស់លើគោលនយោបាយសេដ្ឋកិច្ចរបស់ប្រទេសចិន។

ការយល់ដឹងពីរបៀបដែលប្រទេសចិន មានបំណងឆ្លើយតបទៅនឹងបញ្ហាទាំងនេះ និងភាពទន់ខ្សោយដែលមិននឹកស្មានដល់នៅក្នុងសេដ្ឋកិច្ច គឺជារឿងសំខាន់សម្រាប់អ្នកបង្កើតគោលនយោបាយរបស់សហរដ្ឋអាមេរិក ហើយជម្រើសគោលនយោបាយសេដ្ឋកិច្ចរបស់ប្រទេសចិន មានផលវិបាក។