ប្រទេសហ្គីយ៉ាណា និងវេណេហ្ស៊ុយអេឡា កាលពីថ្ងៃព្រហស្បតិ៍ (ទី១៤ ខែធ្នូ) បានព្រមព្រៀងគ្នា ដើម្បីជៀសវាងការប្រើប្រាស់កម្លាំងណាមួយ និងមិនបង្កើនភាពតានតឹងនៅក្នុងជម្លោះដ៏រ៉ាំរ៉ៃរបស់ពួកគេ ជុំវិញតំបន់ជម្លោះ Esequibo ដែលសម្បូរប្រេង បន្ទាប់ពីកិច្ចប្រជុំ រវាងប្រមុខរដ្ឋរបស់ប្រទេសទាំង២ នៅទីក្រុង Saint Vincent & Grenadines។

តំបន់ ដែលមានផ្ទៃក្រឡា ១៦០.០០០គីឡូម៉ែត្រការ៉េ ជាទូទៅត្រូវបានទទួលស្គាល់ថា ជាផ្នែកមួយនៃប្រទេសហ្គាយ៉ាណា ប៉ុន្តែក្នុងប៉ុន្មានឆ្នាំថ្មីៗនេះ វេណេហ្ស៊ុយអេឡា បានធ្វើការទាមទាររបស់ខ្លួនឡើងវិញចំពោះទឹកដី និងតំបន់ឈូងសមុទ្រនេះ បន្ទាប់ពីការរកឃើញប្រេង និងឧស្ម័នសំខាន់ៗ។

ប្រទេសទាំង២ បានឲ្យដឹងនៅក្នុងសេចក្តីថ្លែងការណ៍រួមថា ពួកគេ «នឹងមិនគំរាមកំហែង ឬប្រើកម្លាំងប្រឆាំងនឹងគ្នាទៅវិញទៅមកក្នុងកាលៈទេសៈណាក៏ដោយ» ហើយ «នឹងអត់ធ្មត់ មិនថា ដោយពាក្យសម្ដី ឬទង្វើ ដើម្បីកុំឲ្យជម្លោះ ឬការខ្វែងគំនិតគ្នាកាន់តែធ្ងន់ធ្ងរឡើង»។

សូមបញ្ជាក់ថា ភាពតានតឹង រវាងប្រទេសទាំង២ បានកើនឡើងយ៉ាងខ្លាំងក្នុងខែនេះ បន្ទាប់ពីអ្នកបោះឆ្នោត នៅក្នុងការបោះឆ្នោតប្រជាមតិវេណេហ្សុយអេឡា បានគាំទ្រវិធានការ ក្នុងការធ្វើឲ្យតំបន់ Esequibo ក្លាយជារដ្ឋថ្មីរបស់វេណេហ្សុយអេឡា និងបានច្រានចោលយុត្តាធិការរបស់តុលាការយុត្តិធម៌អន្តរជាតិ (ICJ) ដែលកំពុងបើកសវនាការលើសំណុំរឿងជម្លោះព្រំដែននេះ៕