​

បេសកជនសន្តិសុខសហរដ្ឋអាមេរិក បាននិយាយទៅកាន់ក្រុមមន្ត្រីអ៊ីស្រាអែល អំពី ការផ្លាស់ប្តូរប្រតិបត្តិការយោធារបស់ប្រទេសនេះ នៅក្នុងតំបន់ហ្កាហ្សាពីយុទ្ធនាការតាមដីគោកដ៏ទូលំទូលាយ ឲ្យបន្ធូរបន្ថយប្រតិបត្តិការដ៏ខ្លាំងក្លាប្រឆាំងក្រុមហាម៉ាស។ ទីប្រឹក្សាសន្តិសុខជាតិ លោក Jake Sullivan បានជួបពិភាក្សាជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃព្រហស្បតិ៍ បន្ទាប់ពីលោកបានជួបជាមួយរដ្ឋមន្ត្រីការពារជាតិ លោក Yoav Gallant ។

សេតវិមាន បានចេញសេចក្តីថ្លែងការណ៍មួយនៅថ្ងៃតែមួយនោះដែរ។ សេចក្តីថ្លែងការណ៍និយាយថា លោក Sullivan ត្រូវបានសង្ខេបលម្អិតអំពីយុទ្ធនាការយោធារបស់អ៊ីស្រាអែលនៅក្នុងតំបន់ហ្កាហ្សារួមទាំងគោលដៅរបស់ខ្លួន ដំណាក់កាល និងការកំណត់លក្ខខណ្ឌសម្រាប់ការផ្លាស់ប្តូរ ជុំវិញបញ្ហាពេលវេលា ពីប្រតិបត្តិការបោសសម្អាតដ៏ខ្លាំងក្លា រហូតដល់មានការបន្ធូរបន្ថយប្រតិបត្តិការខ្លាំងប្រឆាំងអ្នកនៅសេសល់របស់ក្រុមហាម៉ាស។ គេហទំព័រព័ត៌មានរបស់សហរដ្ឋអាមេរិក Axios បានដកស្រង់សម្តីរបស់មន្ត្រីអ៊ីស្រាអែល និងសហរដ្ឋអាមេរិក ដែលបាននិយាយថា លោក Sullivan បានប្រាប់ភាគីអ៊ីស្រាអែលថា យុទ្ធនាការយោធាខ្លាំងក្លា ចាំបាច់ត្រូវផ្លាស់ប្តូរទៅនឹងដំណាក់កាលត្រូវបន្ធូបន្ថយនៅពេលបន្ទាប់ ក្នុងសប្តាហ៍ មិនមែនរហូតដល់ច្រើនខែ។ កាលពីថ្ងៃព្រហស្បិ៍ ប្រធានាធិបតីសហរដ្ឋអាមេរិក លោក Joe Biden បាននិយាយថា លោកចង់ឲ្យអ៊ីស្រាអែល ផ្តោតសំខាន់ទៅលើថាតើត្រូវជួយសង្គ្រោះអាយុជីវិតជនស៊ីវិលដោយរបៀបណា ដោយមិនបញ្ឈប់ការតាមកម្ទេចក្រុមហាម៉ាស ប៉ុន្តែកាន់តែប្រុងប្រយ័ត្ន។

លោក Sullivan ក៏បានកំណត់ពេលជួបជាមួយប្រធានាធិបតីប៉ាឡេស្ទីន លោក Mahmoud Abbas ក្នុងទីក្រុង Ramallah តំបន់ West bank នៅថ្ងៃសុក្រនេះ។ អ្នកទាំងពីរ ត្រូវបានគេរំពឹងថា នឹងពិភាក្សាពីរបៀបដែលតំបន់ហ្កាហ្សាត្រូវគ្រប់គ្រងដោយរបៀបណា បន្ទាប់ពីការប្រយុទ្ធគ្នាបញ្ចប់។