ក្រុមអ្នកវិភាគ នៃរាជបណ្ឌិត្យសភាកម្ពុជាបានមើលឃើញថា ការកាន់ក្បាលម៉េក្រូដើរតាមផ្លូវស្រែកពីចំងាយ និងការចេញរបាយការណ៍ទៅខាងក្រៅវាយប្រហារពីប្រទេសរបស់ខ្លួនមិនមែនជាដំណោះស្រាយល្អនោះទេ តែការខិតជិតរកគ្នារវាងសហជីព និងរាជរដ្ឋាភិបាលទៅវិញទេដែលជាការស្វែងរកដំណោះស្រាយល្អ ការពារផលប្រយោជន៍រួមរបស់ជាតិ។
ការលើកឡើងបែបនេះបន្ទាប់ពីគេសង្កេតឃើញថា រាជរដ្ឋាភិបាលកម្ពុជា ដែលមានក្រសួងការងារ និងបណ្តុះបណ្តាលវិជ្ជាជីវៈជាសេនាធិការនាអាណត្តិ៧នេះបានជួបគ្នាជារើយៗ ក្នុងគោលបំណង ដើម្បីពិភាក្សាការងារ និងដាក់បញ្ហានៅលើតុដើម្បីរកតំណោះស្រាយជុំគ្នា ជៀសជាងធ្វើសកម្មភាពនានាដែលបង្កអសន្តិសុខសង្គម។ តែទោះបីជាយ៉ាងណាក៏ដោយក៏នៅមានដែរសហជីពមួយក្តាប់តូចនៅតែប្រកាន់គោលជំហរបែបនេះ ។
លោកបណ្ឌិត យង់ ពៅ អគ្គលេខាធិការនៃអគ្គលេខាធិការដ្ឋានរាជបណ្ឌិត្យសភាកម្ពុជា បានលើកឡើងថា សហជីពមួយចំនួនតូចគួរឈប់កាន់ក្បាលមេក្រូស្រែកតាមផ្លូវព្រោះវាមិនមែនជាដំណោះស្រាយល្អឡើយ ។ យន្តការចូលជជែកទល់មុខគ្នា ដាក់បញ្ហានៅលើតុមូល ធ្វើយ៉ាងណាការពារផលប្រយោជន៍ជាតិទាំងមូលទៅវិញទេ ដែលជាតម្រូវការពិតប្រាកដរបស់បងប្អូនកម្មករនិយោជិតនៅក្នុងស្រុក ។
លោកពន្យល់ថា រាជរដ្ឋាភិបាលកម្ពុជា និងបណ្តាសហជីពទាំងអស់នៅក្នុងស្រុកបាននឹងកំពុងអនុវត្តតួរនាទី និងមានគោលបំណងតែមួយគត់នោះគឺការការពារសិទ្ធិរបស់បងប្អូនកម្មករនិតោជិត និងរក្សាស្ថេរភាពការងារនៅកម្ពុជា ។ ដូច្នេះហើយភាពស្និទ្ធស្នាល និងការចេះជជែកគ្នារកដំណោះស្រាយ រួមទាំងការពារផលប្រយោជន៍រួមជារឿងមួយសំខាន់ណាស់នាពេលបច្ចុប្បន្ន ។
សម្រាប់លោកបណ្ឌិតរូបនេះបានលើកឡើងទៀតថា៖ «ខ្ញុំគិតថាជាការល្អណាស់សម្រាប់សហជីព និងបរិយាកាសនយោបាយសង្គម និងជាពិសេសនោះគឺការផ្តល់ផលចំណេញដល់បងប្អូនកម្មករនិយោជិតនៅក្នុងស្រុកតែម្តង នោះគឺស្រួលធ្វើការ មិនមានការផ្ទុះសារ៉ាយបញ្ហាផ្សេងៗជាក់ស្តែងលើទស្សនសហជីពហ្នឹង ! ។ ជារួមខ្ញុំវាយតម្លៃថាល្អបើភាគីទាំងពីរនេះចេះអង្គុយជជែកគ្នាដោយសន្តិវិធី» ។
លោកបណ្ឌិតបានបន្ថែមថា៖ «បញ្ហាវាកើតឡើងរវាងមនុស្ស និងមនុស្ស បើទោះបីបញ្ហានោះធំប៉ុណ្ណា តានតឹងយ៉ាងណាក៏ដោយ ឱ្យតែយើងចេះអង្គុយតទល់គ្នា ដោះស្រាយបានបន្តិចៗទៅ គង់តែបង្កើតបានបរិយាកាសល្អនោះទេ ។ ពិតណាស់វានៅតែមានគំនិតខ្វែងគ្នា និងការមិនយល់ស្របគ្នាកន្លែងខ្លះនៅតែបន្តកើតមាន ក៏ប៉ុន្តែវាគង់តែកាត់បន្ថយ ប្រសិនបើយើងអង្គុយតទល់គ្នា ជជែកគ្នាផ្ទាល់» ។
សម្រាប់លោកបណ្ឌិតបានសង្កត់ធ្ងន់ថា យោងតាមស្ថានភាពកម្ពុជាបច្ចប្បន្ននេះ កម្ពុជាត្រូវការជាចាំបាច់ណាស់នូវយន្តការបែបនេះ ពីព្រោះកាលណាភាគីទាំងពីរមានគំនិតស្របគ្នានោះវាធ្វើឱ្យបរិយាកាសវិនិយោគនៅក្នុងស្រុកល្អ ជាពីសេសនៅក្នុងអំឡុងពេលស្ថានភាពសេដ្ឋកិច្ចពិភពលោកកំពុងតែជួបបញ្ហាមកពីសង្គ្រាមនៅរុស្ស៊ី និងអ៊ុយក្រែន និងបញ្ហាធំមួយចំនួនទៀត ។ ដូច្នេះភាគីសហជីព និងរដ្ឋាភិបាលត្រូវតែគិតគូរពីការរក្សាស្ថេរភាពអ្នកវិនិយោគិនក្នុងស្រុក និងសុខដុមរមនាការងារនៅកម្ពុជា ។
លោកបណ្ឌិតបន្ថែមថា ភាគីទាំងពីរនេះគួរតែមានយន្តការបែបនេះតាំងពីតំបូងមក ក៏ប៉ុន្តែបើទោះបីជាយ៉ាងណាក៏ដោយរឿងហួសឱ្យវាហួសទៅចុះ យ៉ាងណាបច្ចុប្បន្ននេះភាគីទាំងពីត្រូវចេះជួបជជែកគ្នាម្តងម្កាល ដាក់បញ្ហានៅនៅលើតុ ។ ការដែលស្រែកដាក់ក្បាលមេក្រូ និង ការចេញរបាយការណ៍វាយប្រហាគ្នាពីចំងាយនោះមិនមែនជាតំណោះស្រាយល្អនោះទេ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
