រដ្ឋមន្ត្រីការបរទេសបារាំង បានធ្វើដំណើរទៅប្រទេសលីបង់ កាលពីថ្ងៃសៅរ៍ ជាផ្នែកនៃកិច្ចខិតខំប្រឹងប្រែងការទូតរបស់រដ្ឋាភិបាលលោកប្រធានាធិបតី អេម៉ានូអែល ម៉ាក្រុង (Emmanuel Macron) ដើម្បីជួយទប់ស្កាត់ជម្លោះមជ្ឈិមបូព៌ា។

ការភ័យខ្លាចនៃសង្គ្រាមកាន់តែធំឡើងៗ ដោយក្រុមដែលគាំទ្រដោយអ៊ីរ៉ង់ បានកំណត់គោលដៅលើកងកម្លាំងសហរដ្ឋអាមេរិក និងសម្ព័ន្ធមិត្ត នៅក្នុងប្រទេសអ៊ីរ៉ាក់ និងស៊ីរី និងការបាញ់ប្រហារគ្នាជារៀងរាល់ថ្ងៃនៅ តាមព្រំដែនអ៊ីស្រាអែលជាមួយប្រទេសលីបង់។

អ្នកនាំពាក្យក្រសួងការបរទេស លោក Christophe Lemoine បាននិយាយនៅមុនដំណើរទស្សនកិច្ចរបស់រដ្ឋមន្ត្រីការបរទេសលោកស្រី Catherine Colonna ថា៖«យើងត្រូវតែជៀសវាងការផ្ទុះសង្គ្រាមក្នុងតំបន់»។

លោកស្រី Colonna នឹងអំពាវនាវឲ្យមាន «ការអត់ធ្មត់» និង «ការទទួលខុសត្រូវ» ដើម្បីជៀសវាងខ្សែត្រៀមជួរមុខថ្មី នៅតាមព្រំដែនអ៊ីស្រាអែល-លីបង់»។

មានការបាញ់គ្នាឆ្លងព្រំដែនស្ទើររៀងរាល់ថ្ងៃរវាងក្រុមហេសបូឡា ដែលជាសម្ព័ន្ធមិត្តរបស់ក្រុមហាម៉ាសដែលគាំទ្រដោយអ៊ីរ៉ង់នៅលីបង់ និងអ៊ីស្រាអែល ចាប់តាំងពីការវាយប្រហារដែលមិនធ្លាប់មានពីមុនមករបស់ក្រុមប៉ាឡេស្ទីនកាលពីថ្ងៃទី៧ ខែតុលា ទៅលើអ៊ីស្រាអែល ដែលមន្ត្រីអ៊ីស្រាអែល បាននិយាយថាបានសម្លាប់មនុស្សប្រហែល ១.២០០នាក់ ភាគច្រើនជាជនស៊ីវិល។