អ្នកស្រុកទីក្រុងគីវ នៅថ្ងៃសុក្រ (ទី១៥ ខែធ្នូ) នេះ បានសាទរការសម្រេចរបស់មេដឹកនាំសហភាពអឺរ៉ុប ឬ EU ក្នុងការបើកឲ្យមានការពិភាក្សាសមាជិកភាពជាមួយប្រទេសអ៊ុយក្រែន ដោយប្រជាជនអ៊ុយក្រែនមួយចំនួន បាននិយាយថា ការចូលរួមក្នុងសហភាពអឺរ៉ុប អាចជួយឲ្យប្រទេសរបស់ពួកគេបញ្ចប់សង្រ្គាមជាមួយរុស្ស៊ី។

នៅឯកិច្ចប្រជុំកំពូល នាទីក្រុងប្រ៊ុចសែល ប្រទេសបែលហ្ស៊ិក បណ្ដាមេដឹកនាំផ្សេងទៀត បានបញ្ចៀសការជំទាស់ពីនាយករដ្ឋមន្ត្រីហុងគ្រី លោក Viktor Orban ដោយឲ្យលោកចាកចេញពីបន្ទប់ ខណៈពេលដែលមេដឹកនាំទាំងនោះ បានបោះជំហានជាប្រវត្តិសាស្ត្រ ដោយយល់ព្រមចាប់ផ្តើមពិភាក្សាការចូលជាសមាជិកជាមួយប្រទេស ដែលមានសង្រ្គាម។

ប៉ុន្តែទោះជាយ៉ាងណាក្ដី ពួកគេក៏មិនអាចជម្នះលើការជំទាស់របស់លោក Orban ដែលបន្តទំនាក់ទំនងយ៉ាងជិតស្និទ្ធជាមួយរុស្ស៊ី ចំពោះការកែប្រែថវិការបស់ប្លុកនេះ ដើម្បីបញ្ជូនការគាំទ្រផ្នែកហិរញ្ញវត្ថុដ៏សំខាន់ដល់អ៊ុយក្រែន និងផ្តល់សាច់ប្រាក់បន្ថែមទៀត សម្រាប់អាទិភាពសហភាពអឺរ៉ុបផ្សេងទៀត ដូចជាការគ្រប់គ្រងទេសន្តរប្រវេសន៍ជាដើម៕