ប្រទេស និងធុរកិច្ចជាច្រើន នៅក្នុងវេទិកាធំមួយរបស់អង្គការសហប្រជាជាតិ បានសន្យាទឹកប្រាក់ជាង ២,២ពាន់លានដុល្លារអាមេរិក ឆ្ពោះទៅរកដំណោះស្រាយវិបត្តិការភៀសខ្លួនជាសកល និងបានសន្យាការងារសម្រាប់ជនភៀសខ្លួនរាប់ម៉ឺននាក់ ក្នុងលទ្ធផលដែលប្រមុខអង្គការសហប្រជាជាតិ បាននិយាយថានឹងជួយទប់ស្កាត់ជំនោរនៃទុក្ខលំបាក ។

មនុស្សរាប់ពាន់នាក់ មកពីទីភ្នាក់ងារផ្តល់ជំនួយ ធុរកិច្ច និងសង្គមស៊ីវិល ព្រមទាំងជនភៀសខ្លួន បានចូលរួមក្នុងព្រឹត្តិការណ៍នៅក្នុងទីក្រុងហ្សឺណែវ ខណៈចំនួនជនភៀសខ្លួននៅទូទាំងពិភពលោក កើនលើសពីកំណត់ត្រា ១១៤ លាននាក់ ក្នុងពេលមានជម្លោះ ភាពក្រីក្រ និងបម្រែបម្រួលអាកាសធាតុ។

ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) លោក Filippo Grandi បាននិយាយថា លោករីករាយ និងមានមោទនភាព ចំពោះលទ្ធផលដែលកើតមានឡើង ខណៈទីភ្នាក់ងារអង្គការសហប្រជាជាតិប្រឈមទៅនឹងការខ្វះខាតថវិកាធ្ងន់ធ្ងរ និងព្យាយាមប្រឆាំងរឿងព្រេងការនិទាន របស់ប្រទេសលោកខាងលិច ដែលកំពុងបន្តកើតមាន ដែលបានចាត់ទុកជនភៀសខ្លួនថាជាការគំរាមកំហែង។

អង្គការ UNHCR រៀបចំវេទិកាជនភៀសខ្លួនសកលរៀងរាល់បួនឆ្នាំម្តង ក្រោមក្របខណ្ឌមួយ ដើម្បីចែករំលែកទំនួលខុសត្រូវសម្រាប់ជនភៀសខ្លួនដោយស្មើភាព។ 

ទន្ទឹមនឹងការសន្យាផ្នែកហិរញ្ញវត្ថុ ប្រទេសនានាក៏បានសន្យាទទួលយកជនភៀសខ្លួន ១ លាននាក់ពីប្រទេសទីបីនៅឆ្នាំ ២០៣០។ 

អគ្គលេខាធិការអង្គការសហប្រជាជាតិ លោក Antonio Guterres បាននិយាយនៅក្នុងសុន្ទរកថាបិទ បន្ទាប់ពីបានលើកឡើងពីវិបត្តិមនុស្សធម៌ក្នុងសហភាពមីយ៉ាន់ម៉ា យេម៉ែន សូម៉ាលី និងតំបន់ហ្កាហ្សា វេទិកានេះកំពុងជួយទប់ស្កាត់ជំនោរនៃទុក្ខលំបាក។