​

មន្ត្រីការពារជាតិសហរដ្ឋអាមេរិក បាននិយាយថា ការវាយប្រហារពីប្រទេសយេម៉ែន គ្រប់គ្រងដោយក្រុមឧទ្ទាមហួធី បានធ្លាក់ទៅលើនាវាដោតទង់ជាតិប្រទេសលីបេរីយ៉ាចំនួនពីរគ្រឿង នៅច្រកសមុទ្រ Bab al-Mandab កាលពីថ្ងៃសុក្រ ដោយបានបញ្ជាក់ពីការគំរាមកំហែងដល់នាវានៅក្នុងផ្លូវដឹកជញ្ជូនដែលត្រូវបានកំណត់គោលដៅដោយក្រុមមានសម្ព័ន្ធមិត្តអ៊ីរ៉ង់។ ក្រុមហ៊ុនដឹកជញ្ជូនដាណឺម៉ាក AP Moller-Maersk បាននិយាយថា ក្រុមហ៊ុននឹងផ្អាកការដឹកជញ្ជូនទូទំនិញទាំងអស់ឆ្លងកាត់សមុទ្រក្រហម រហូតដល់មានការជូនដំណឹងបន្ថែម។ បណ្តាញដឹកជញ្ចូនទូទំនិញរបស់អាល្លឺម៉ង់ Hapag Lloyd បាននិយាយថា ក្រុមក៏កំពុងពិចារណាលើវិធានការ ស្រដៀងគ្នានេះ។

មន្ត្រីអាមេរិកនិយាយថា វត្ថុមួយ ដែលត្រូវបានគេជឿថាជាយានដ្រូន បានវាយប្រហារនាវាមួយគ្រឿង ដោតទង់ជាតិប្រទេសលីបេរីយ៉ា ជាកម្មសិទ្ធិរបស់ប្រទេសអាល្លឺម៉ង់ Al Jasrah បណ្តាលឱ្យមានអគ្គីភ័យប៉ុន្តែពុំមានអ្នករងរបួសនោះទេ។ មន្ត្រីបាននិយាយថា នាវាពិឃាតរបស់កងទ័ពជើងទឹកអាមេរិកមួយគ្រឿង កំពុងធ្វើដំណើរទៅជួយនាវានេះ ដោយពុំបញ្ចេញឈ្មោះនាវានោះទេ។

ក្រុមហួធី បាននិយាយថា នាវាទាំងពីរគ្រឿង បានធ្វើដំណើរទៅកាន់ប្រទេសអ៊ីស្រាអែល។ សេចក្តីថ្លែងការណ៍របស់ក្រុមហួធី បាននិយាយថា យើងនឹងបន្តរារាំងនាវាទាំងអស់ដែលធ្វើដំណើរទៅកាន់កំពង់ផែប្រទេសអ៊ីស្រាអែល រហូតដល់ស្បៀងអាហារ និងថ្នាំពេទ្យ ដែលប្រជាជនរបស់យើងត្រូវការនៅក្នុងតំបន់ហ្កាហ្សា ត្រូវបាននាំយកមក។

ក្រុមនេះនិយាយថា យើងធានាចំពោះនាវាទាំងអស់ ដែលធ្វើដំណើរទៅកាន់កំពង់ផែលើពិភពលោក ក្រៅពីកំពង់ផែរបស់ប្រទេសអ៊ីស្រាអែលថា នាវានឹងពុំមានផលប៉ះពាល់អ្វីឡើយ ហើយនាវាត្រូវតែមានឧបករណ៍កំណត់អត្តសញ្ញាណ។