មនុស្សរាប់រយនាក់ បានតវ៉ានៅទីក្រុង Tel Aviv ប្រទេសអ៊ីស្រាអែល កាលពីយប់ថ្ងៃសុក្រ ប៉ុន្មានម៉ោងបន្ទាប់ពីយោធាអ៊ីស្រាអែល បានប្រកាសថាខ្លួនបានសម្លាប់ចំណាប់ថ្នូរបីនាក់ច្រឡំ ខណៈត្រូវបានក្រុមហាម៉ាស់ឃុំខ្លួននៅតំបន់ហ្កាហ្សា ក្នុងអំឡុងពេលឧប្បត្តិហេតុមួយ។

ក្រុមបាតុករ បានមកជួបគ្នាជាលើកដំបូងនៅខាងក្រៅបរិវេណយោធាក្នុងទីក្រុង Tel Aviv ហើយក្រោយមកបានដើរដង្ហែរឆ្លងកាត់ទីក្រុង ដោយមានកាន់ផ្ទាំងរូបថតចំណាប់ថ្នូរដែលនៅតែត្រូវបានឃុំខ្លួនក្នុង តំបន់ហ្កាហ្សា ហើយបានអំពាវនាវឱ្យរដ្ឋាភិបាលនាំយកពួកគេត្រឡប់មកប្រទេសវិញ។

សេចក្តីថ្លែងការណ៍របស់យោធានិយាយថា ក្នុងអំឡុងពេលនៃការប្រយុទ្ធគ្នាខ្លាំងនៅតំបន់ហ្កាហ្សា ខ្លួនបាន កំណត់អត្តសញ្ញាណចំណាប់ថ្នូរអ៊ីស្រាអែលបីនាក់ថាជាការគំរាមកំហែង។ ជាលទ្ធផល ទាហានបានបាញ់ទៅលើពួកគេបណ្តាលឲ្យស្លាប់។

ហ្វូងមនុស្សយ៉ាងច្រើនបានប្រមូលផ្តុំគ្នានៅចំនុចប្រសព្វតំបន់ Kaplan ក្នុងទីក្រុង Tel Aviv ហើយបានបិទផ្លូវធ្វើចរាចរណ៍ ខណៈពួកគេដើរឆ្ពោះទៅកាន់ទីបញ្ជាការយោធាតំបន់ Kirya របស់កងកម្លាំងការពារអ៊ីស្រាអែល ក្នុងការតវ៉ាភ្លាមៗដោយអំពាវនាវឱ្យរដ្ឋាភិបាលចាត់វិធានការដើម្បីធានាបានការដោះលែងចំណាប់ថ្នូរ។

ហ្វូងមនុស្សត្រូវបានគេឮស្រែកពាក្យថា «ពេលវេលារបស់ពួកគេជិតអស់ហើយ! នាំពួកគេត្រឡប់មកលំនៅឋានវិញឥឡូវនេះ» គ្មានជ័យជម្នះណាមួយឡើយ រហូតដល់ចំណាប់ថ្នូរចុងក្រោយត្រូវត្រូវបានដោះលែង។