កូរ៉េខាងជើង៖ សារព័ត៌មាន​រដ្ឋ​បាន​រាយការណ៍​នៅ​ថ្ងៃ​សុក្រ​នេះ​ថា មេដឹកនាំ​កូរ៉េខាងជើង​លោក Kim Jong Un បាន​បញ្ជា​ឱ្យ​រដ្ឋាភិបាល​របស់​លោក​ត្រៀមខ្លួន​ឲ្យ​បាន​ពេញលេញ ​សម្រាប់​ការ​ប្រឈម​ជាមួយ​រដ្ឋបាល​របស់​លោក​ប្រធានាធិបតី​អាមេរិក Joe Biden ប៉ុន្មាន​ថ្ងៃ​បន្ទាប់ពី​សហរដ្ឋអាមេរិក និង​មហាអំណាច​ពិភព​លោក​ធំ​ៗ​ផ្សេងទៀត បាន​ជំរុញ​កូរ៉េខាងជើង​ឲ្យ​បោះបង់ចោល​កម្មវិធី​អាវុធ​នុយក្លេអ៊ែរ​របស់​ខ្លួន ​និង​វិល​ទៅ​រក​ការចរចា​ឡើងវិញ​។

​ទីភ្នាក់ងារសារព័ត៌មាន​កណ្ដាល​កូរ៉េខាងជើង KCNA បាន​និយាយ​ថា​ លោក Kim បាន​ចេញ​បទ​បញ្ជា​កាលពី​ថ្ងៃ​ព្រហស្បតិ៍​ ខណៈ​ការ​បញ្ជាក់​ពី​ជំហាន​ដែល​កូរ៉េខាងជើង​ត្រូវ​ធ្វើ ​ដើម្បី​ឆ្លើយ​តប​ទៅ​នឹង​ទិសដៅ​គោលនយោបាយ​រដ្ឋាភិបាល​ថ្មី​ របស់​ប្រធានាធិបតី​អាមេរិក​លោក Joe Biden ក្នុង​អំឡុង​ពេល​កិច្ចប្រជុំ​គណបក្ស​កាន់​អំណាច​ កំពុង​បន្ត​នៅ​ទីក្រុង​ព្យុងយ៉ាង​។​ ទីភ្នាក់​ងារសារព័ត៌មាន ​KCNA បាន​និយាយ​ថា ​លោក Kim បាន​សង្កត់ធ្ងន់​លើ​ភាព​ចាំ​បាច់​ ដើម្បី​ត្រៀម​សម្រាប់​ទាំង​ការសន្ទនា​ទាំង​ការ​ប្រឈម ​ជាពិសេស​ដើម្បី​ត្រៀមខ្លួន​ឲ្យ​បាន​ពេញលេញ ​សម្រាប់​ការ​ប្រឈម​ជាមួយ​រដ្ឋបាល​លោក Biden តែម្ដង​។​

​កាលពី​ឆ្នាំ២០១៨ ​ដល់ឆ្នាំ​២០១៩ លោក Kim បាន​បើក​កិច្ចប្រជុំ​កំពូល​សំខាន់ៗជា​បន្តបន្ទាប់ ​ជាមួយ​អតីត​ប្រធានាធិបតី​កាន់​តំណែង​មុន​របស់​លោក Biden គឺ​លោក Donald Trump ដើម្បី​ពិភាក្សា​ពី​អនាគត​នៃ​ឃ្លាំង​អាវុធ​នុយក្លេអ៊ែរ​ដែល​កំពុង​ជឿនលឿន​។ ប៉ុន្តែ​ការចរចា​នុយក្លេអ៊ែរ​របស់​មេដឹកនាំ​ទាំង​២ ​នៅ​ទីបំផុត​បាន​បរាជ័យ​ បន្ទាប់ពី​លោក Trump បាន​ច្រានចោល​ការ​អំពាវនាវ​របស់​លោក Kim សម្រាប់​ការ​បន្ធូរបន្ថយ​ទណ្ឌកម្ម​យ៉ាង​ច្រើន​ ជា​ថ្នូរ​នឹង​ការ​ប្រគល់​ដោយ​ផ្នែក​នៃ​សមត្ថភាព​នុយក្លេអ៊ែរ​របស់​លោក​៕

អត្ថបទ៖ សុខមាន