ក្រុមមន្ត្រីបាននិយាយថា ច្រកឆ្លងព្រំដែន ការ៉ែម សាឡុម (Kerem Shalom) រវាងអ៊ីស្រាអែល និងតំបន់ហ្កាហ្សាបានបើកកាលពីថ្ងៃអាទិត្យ១៧ខែ ធ្នូ សម្រាប់​រថយន្ត​ដឹក​ជំនួយ​ជា​លើក​ដំបូង​ចាប់​​តាំង​ពីការផ្ទុះសង្រ្គាម ជាកាយវិការមួយ មានគោលបំណងដើម្បីបង្កើនចំនួនស្បៀងអាហារ និង​ថ្នាំ​ពេទ្យទ្វេដងដល់តំបន់រងការឡោមព័ទ្ធដោយអ៊ីស្រាអែលមួយនេះ។ 

ច្រកឆ្លង​កាត់​នេះ ត្រូវបានបិទបន្ទាប់ពីការវាយប្រហារកាលពីថ្ងៃទី ៧ ខែតុលា​ដោយ​ក្រុម​ហាម៉ាស​ហើយ​ជំនួយត្រូវបានបញ្ជូនតាមរយៈច្រកព្រំដែន រ៉ាហ្វា(Rafah) របស់ហ្កាហ្សា ជាប់ជាមួយ​ប្រទេស​អេហ្ស៊ីប ដែលអ៊ីស្រាអែលបាននិយាយថា អាចទទួលបានតែរថយន្តដឹកទំនិញចំនួន ១០០ គ្រឿងប៉ុណ្ណោះ ក្នុងមួយថ្ងៃ ។    

ប្រភព​ចំនួនពីរនៅក្នុងអង្គការអឌ្ឍចន្ទក្រហមអេហ្ស៊ីបបានប្រាប់សារព័ត៌មានReuters ថា​រថយន្ត​ដឹក​ទំនិញ​បានចាប់ផ្តើមចូលកាលពីថ្ងៃអាទិត្យតាមរយៈការឆ្លងកាត់ច្រកឆ្លងព្រំដែន ការ៉ែម សាឡុម (Kerem Shalom) ចូលទៅក្នុងតំបន់ហ្កាហ្សា ។ មនុស្សម្នាក់ បាននិយាយថា មាន​រថយន្ត​ដឹក​ទំនិញចំនួន ៧៩ គ្រឿងបានចូលទៅ។      

ច្រកឆ្លងព្រំដែន ការ៉ែម សាឡុម នៅតាមព្រំដែនជាប់ជាមួយប្រទេសអេហ្ស៊ីប អ៊ីស្រាអែល និង​តំបន់ហ្កាហ្សា គឺជាចំណុចឆ្លងកាត់ដ៏សំខាន់មួយសម្រាប់ទំនិញទាំងក្នុង និងក្រៅ តំបន់ហ្កាហ្សា ដែល​ប្រើរយៈពេលដឹកជញ្ជូនឆាប់ជាងតាមច្រកព្រំដែន Rafah ។

ប្រភព​ពីមន្ត្រីសន្តិសុខអេហ្ស៊ីប២រូប បាននិយាយកាលពីថ្ងៃអាទិត្យថា ទាំងអ៊ីស្រាអែល ទាំង​ក្រុម​ហាម៉ាស សុទ្ធតែបើកឲ្យមានបទឈប់បាញ់ថ្មី និងការដោះលែងចំណាប់ថ្នូរជាថ្មី ទោះ​បី​ជា​ការ​ព្រម​ព្រៀង​នៅមិនទាន់ច្បាស់ថានឹងអនុវត្តន៍នៅពេលណាក៏ដោយ៕