កងកម្លាំងអ៊ីស្រាអែល ដែលកំពុងប្រយុទ្ធនឹងក្រុមហាម៉ាស បាននិយាយថា ពួកគេបានរកឃើញផ្លូវរូងក្រោមដីបេតុង និងធ្វើពីដែកដ៏ធំខុសពីធម្មតា ដែលត្រូវបានបង្កើតឡើងដើម្បីផ្ទុកទំនិញរបស់ក្រុមសកម្មប្រយុទ្ធនេះពីតំបន់ហ្កាហ្សា ឆ្ពោះទៅព្រំដែន។
ការបំផ្លាញ ឬបិទផ្លូវក្រោមដី និងលេណដ្ឋានរាប់រយគីឡូម៉ែត្ររបស់ក្រុមហាម៉ាស គឺស្ថិតក្នុងចំណោមគោលដៅនៃការវាយលុករបស់អ៊ីស្រាអែល ដែលបានចាប់ផ្តើមបន្ទាប់ពីខ្មាន់កាំភ្លើងក្រុមសកម្មប្រយុទ្ធមួយនេះ បានបើកការសម្លាប់ និងចាប់ខ្លួននៅទីក្រុងភាគខាងត្បូងរបស់ខ្លួន និងមូលដ្ឋានទ័ពកាលពីថ្ងៃទី០៧ ខែតុលា។
ក្នុងចំណោមទីតាំងដែលក្រុមហាម៉ាស សម្រុកចូលក្នុងការវាយប្រហារនោះ គឺច្រកព្រំដែន អេរ៉េស (Erez) រវាងតំបន់ហ្កាហ្សា និងអ៊ីស្រាអែល។ ចម្ងាយត្រឹមតែ ១០០ម៉ែត្រ ភាគខាងត្បូងនៃប៉ុស្តិ៍ត្រួតពិនិត្យ ក្រុមយោធាបានបង្ហាញអ្នកយកព័ត៌មានពីចំណុចច្រកចេញ នៃអ្វីដែលខ្លួនបាននិយាយថា ជាគម្រោងផ្លូវក្រោមដីដ៏សំខាន់ និងធំបំផុតរបស់ក្រុមហាម៉ាស ដែលលាក់នៅក្នុងវាលខ្សាច់។
ផ្លូវរូងក្រោមដីនោះមានអង្កត់ទ្រូងជម្រៅ ៥០ម៉ែត្រ ហើយបានពង្រីកដល់កម្ពស់ និងទទឹង ៣ម៉ែត្រ ជាមួយនឹងការបំពាក់ឧបករណ៍អគ្គិសនី។
ផ្លូវរូងក្រោមដីរបស់ក្រុមហាម៉ាសទាំងនោះ គឺជាបញ្ហាប្រឈមមួយសម្រាប់ទាហានវិស្វកររបស់អ៊ីស្រាអែល ដោយបារម្ភថាបណ្តាញទាំងនេះអាចលាក់ចំណាប់ថ្នូរដែលក្រុមហាម៉ាស បានចាប់ខ្លួន។ បញ្ហាចំណាប់ថ្នូរបានបន្ថយល្បឿននៃការវាយលុករបស់អ៊ីស្រាអែល ដែលបានធ្វើឲ្យចំនួនអ្នកស្លាប់ជនស៊ីវិលប៉ាឡេស្ទីនកើនឡើង និងបានធ្វើឱ្យមហាអំណាចពិភពលោកព្រួយបារម្ភយ៉ាងខ្លាំង៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
