កងកម្លាំងរក្សាសន្តិភាពរបស់កម្ពុជាចំនួន១១០នឹងធ្វើមាតុភូមិនិវត្តន៍មកកម្ពុជាវិញ នាល្ងាច​ថ្ងៃទី​១៨ ខែធ្នូ ឆ្នាំ២០២៣នេះ ក្រោយ​បញ្ចប់​បេសកកម្ម​រក្សា​សន្តិភាព​របស់​អង្គកា​រ​សហ​ប្រជាជាតិ​នៅ​សាធារណរដ្ឋម៉ាលី និងប្រទេស៊ូដង់ខាងត្បូង។

កងកម្លាំងមួកខៀវដែលបានបញ្ចប់បេសកកម្មរបស់ខ្លួននៅសាធារណៈរដ្ឋម៉ាលី និងប្រទេសស៊ូដង់ ខាង​ត្បូងនេះ គឺមានកងវិស្វកម្មព្រលានយន្តហោះលេខ៧២៩ កងកម្ទេច​គ្រាប់​មិន​ទាន់​ផ្ទុះលេខ​៨២៨ និង កងរាជអាវុធហត្ថលេខ១៧១។ កម្មវិធីការទទួលស្វាគមន៍ដំណើរនិវត្តន៍របស់ពួកគេនឹងធ្វើឡើងនាល្ងាច ថ្ងៃទី១៨ ខែធ្នូ នេះ​នៅ​មូលដ្ឋាន​កងទ័ពអាកាសកម្ពុជា ក្រោមអធិបតីភាពនាយឧត្តមសេនីយ៍ ទៀ សីហា ឧបនាយក​រដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា និងតំណាងអង្គការសហប្រជាជាតិប្រចាំនៅកម្ពុជា។

កម្ពុជា​ដែលធ្លាប់ទទួលវត្តមានបេសកកម្ម អ៊ុនតាក់ (UNTAC) បានក្លាយ​ជា​ប្រទេស​បញ្ជូន​កងទ័ព​មួក​ខៀវ​ចូលរួមបេសកកម្មរក្សាសន្តិភាពនៅបណ្តាប្រទេសនានាលើពិភពលោក ក្រោយមាន​ការ​ស្នើ​សុំ​ពី​អង្គការសហប្រជាជាតិចាប់ពីឆ្នាំ២០០៦មកដល់ឆ្នាំ២០២៣នេះ ទៅកាន់ប្រទេសចំនួន ១០ ក្នុងបេសកកម្មចំនួន១២ រួមមាន ៖ប្រទេសស៊ូដង់ ស៊ូដង់ខាងត្បូង ឆាដ លីបង់ ម៉ាលី អាហ្វ្រិក​កណ្តាល ស៊ីរី សាយព្រឹស យេមែន និងសាធារណរដ្ឋប្រជាធិបតេយ្យកុងហ្គោ ដោយ​សរុប​មាន​ចំនួន៩,២០៥នាក់ ក្នុងនោះនារីចំនួន៧២៦នាក់។ កង​កម្លាំង​មួក​ខៀវ​ជាង​ ៩ពាន់​នាក់​ដែល​បាន​ទៅ​បំពេញបេសកកម្មរក្សាសន្តិភាពក្រោមឆត្រអង្គការសហប្រជាជាតិនោះ គឺមានលើ​ជំនាញ​បោស​សម្អាត​គ្រាប់មីន កម្ទេចគ្រាប់មិនទាន់ផ្ទុះ អាវុធហត្ថ មន្ទីរពេទ្យកម្រិត២ វិសកម្មសំណង់ វិស្វកម្ម​ព្រលានយន្តហោះ នាយទាហានសេនាធិការ និងនាយទាហានសង្កេតការណ៍ជាដើម។

នៅ​ចំពោះមុខតំណាងអង្គការសហប្រជាជាតិ និងថ្នាក់ដឹកនាំបណ្តាប្រទេសនៅលើពិភពលោក កាលពីដើមខែធ្នូកន្លងទៅ ក្នុងកិច្ចប្រជុំកិច្ចប្រជុំថ្នាក់រដ្ឋមន្ត្រី ស្តីពីការ​រក្សា​សន្តិភាព​ក្នុង​ក្រប​ខណ្ឌ​អង្គ​ការ​សហប្រជាជាតិលើកទី៧នៅប្រទេសហ្កាណា នាយឧត្តមសេនីយ៍ ទៀ សីហា ឧបនាយករដ្ឋមន្រ្តី​ រដ្ឋមន្រ្តីក្រសួងការពារជាតិកម្ពុជា បានប្តេជ្ញាថា កម្ពុជាគ្មានការ​អល់អែក​ក្នុង​ការ​បន្ត​បញ្ជូ​នកងទ័ពមួកខៀវរបស់ខ្លួន ទៅកាន់បណ្តាប្រទេសនានា​ដែល​កំពុង​មាន​ភ្នក់​ភ្លើង​សង្រ្គាម​នោះ​ទេ បន្ទាប់ពីមានការស្នើសុំពីអង្គការសហប្រជាជាតិនោះ។

នាយឧត្តមសេនីយ៍ ទៀ សីហា បានបញ្ជាក់ថា«ដើម្បីបុព្វហេតុសន្តិភាព និងបេះដូងស្អប់សង្គ្រាម កម្ពុជា​មិន​រាថយឡើយ ដើម្បីបន្តបរិច្ចាគដល់ស្ថេរភាព សន្តិសុខ សន្តិភាពពិភពលោក ការ​អភិវឌ្ឍន៍ ប្រកបដោយចីរភាព និងវិបុលភាពសម្រាប់គ្រប់មនុស្សជាតិ។ ទោះក្នុង​កាលៈ​ទេសៈ​ណា​ក៏​ដោយ កម្ពុជាផ្តល់ តំលៃខ្ពស់ដល់ សន្តិភាព និងមិនគាំទ្រសង្គ្រាមឡើយ។

នាយ​ឧត្តមសេនីយ៍ ទៀ សីហា ក៏បានប្រកាសនៅក្នុងកិច្ចប្រជុំខាងលើផងដែរថា កម្ពុជា​បន្ត​ការ​ប្តេជ្ញា​ចិត្ត​ក្នុងប្រព័ន្ធត្រៀមជាស្រេច( UN PCRS) ដោយក្នុងនោះ​រួមមាន​កង​អនុសេនាធំ​វិស្វកម្ម​ចំនួន​០១កង កងរាជអាវុធហត្ថចំនួន០១កង និងនាយទាហានសេនាធិការ និងសង្កេតការណ៍។ លើស​ពី​នេះកម្ពុជាសូមប្រកាសការប្តេជ្ញាចិត្តចល័តកងកម្លាំងថ្មី២កងក្នុងប្រព័ន្ធត្រៀមជាស្រេច (UNPCRS) គឺ​កងអនុសេនាធំស្ពានចល័តចំនួន០១កង និងកងអនុសេនាធំ​កម្ទេច​គ្រឿង​ផ្ទះ​ចំនួន ០១​កងជាដើម៕ អត្ថបទ៖ បាន ចក់