អតីតប្រធានាធិបតីអាមេរិក និងជាបេក្ខជនប្រធានាធិបតីមកពីគណបក្សសាធារណរដ្ឋ លោក ដូណាល់ ត្រាំ (Donald Trump) បាននិយាយកាលពីថ្ងៃអាទិត្យ (១៧ ធ្នូ) ថាលោកគ្រោងនឹងធ្វើ «ការនិរទេសជនអន្តោប្រវេសន៍ដ៏ធំបំផុតនៅក្នុងប្រវត្តិសាស្ត្រអាមេរិក» ប្រសិនបើលោកជាប់ឆ្នោតក្លាយជាប្រធានាធិបតីឡើងវិញនៅឆ្នាំ២០២៤។

ថ្លែងនៅឯការប្រមូលផ្តុំមួយនៅទីក្រុង រ៉េណូ (Reno) រដ្ឋ ណាវេដា (Nevada) លោក ត្រាំ បានហៅប្រធានាធិបតីសហរដ្ឋអាមេរិក លោក ចូ បៃដិន (Joe Biden) ថាជា «បុគ្គលដែលមានប្រាជ្ញាទាប» និងជា «ប្រធានាធិបតីដ៏អាក្រក់បំផុត អសមត្ថភាព និងពុករលួយបំផុត» ក្នុងប្រវត្តិសាស្ត្រសហរដ្ឋអាមេរិក។

កាលពីថ្ងៃសៅរ៍ (១៦ ធ្នូ) អតីតប្រធានាធិបតីរូបនេះបាននិយាយថា ជនអន្តោប្រវេសន៍ដែលគ្មានឯកសារ «កំពុងបំពុលប្រទេសរបស់យើង» ដោយជាភាសាដដែលៗ ដែលពីមុនបានទាក់ទាញការរិះគន់ថាជាការស្អប់ខ្ពើមជាតិសាសន៍ និងជាការផ្សព្វផ្សាយវោហាសាស្ត្ររបស់អង្គការណាហ្ស៊ី។

លោក ត្រាំ បានធ្វើអត្ថាធិប្បាយបែបនេះក្នុងអំឡុងពេលព្រឹត្តិការណ៍យុទ្ធនាការបោះឆ្នោតមួយនៅរដ្ឋ ញ៉ូវ ហែស៊ៀរ (New Hampshire) ជាទីដែលលោកនិយាយបានប្រឆាំងនឹងចំនួនជនអន្តោប្រវេសន៍ដ៏ច្រើនលើសលប់ដែលប៉ុនប៉ងឆ្លងកាត់ព្រំដែនសហរដ្ឋអាមេរិកដោយខុសច្បាប់៕