បន្ទាយមានជ័យ​ ៖​ មជ្ឈមណ្ឌលសំចត និងស្តារនីតិសម្បទាជនរងគ្រោះប៉ោយប៉ែត​ ស្ថិតនៅ​ក្នុង​ក្រុង​ប៉ោយប៉ែត​ ត្រូវបានដាក់សម្ពោធឱ្យប្រើប្រាស់ជាផ្លូវការនៅព្រឹកថ្ងៃទី១៨​ ខែធ្នូ​ ឆ្នាំ២០២៣​។

ការដាក់ឱ្យប្រើប្រាស់មជ្ឈមណ្ឌលសំចត និងស្តារនីតិសម្បទាជនរងគ្រោះប៉ោយប៉ែត​ ធ្វើឡើង​ក្រោម​អធិបតីភាពដ៏ខ្ពង់ខ្ពស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រី​ក្រសួង​មហាផ្ទៃ និងជាប្រធានគណៈកម្មាធិការជាតិប្រយុទ្ធប្រឆាំងការជួញដូរមនុស្ស តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា​។

ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច​ បានឱ្យដឹងថា​ គម្រោងសាងសង់​មជ្ឈ​មណ្ឌល​សំចត និងស្តារនីតិសម្បទាជនរងគ្រោះប៉ោយប៉ែត​​ មានទីតាំងស្ថិតក្នុងភូមិប្រជាធម្មកើត សង្កាត់​អូរ​ឬស្សី ក្រុងប៉ោយប៉ែត ខេត្តបន្ទាយមានជ័យ។​

ឯកឧត្តម​ បន្តថា​ ការសាងសង់មជ្ឈមណ្ឌលសំចត និងស្តារនីតិសម្បទាសម្រាប់ជនរងគ្រោះ ជា​ជំនួយ​ឥតសំណង​រាជរដ្ឋាភិបាល​ នៃព្រះរាជាណាចក្រថៃ ចំនួនទឹកប្រាក់ ២,១៩៩,៩២០ ដុល្លារ​សហរដ្ឋ​អាមេរិក ហើយគម្រោងសាងសង់នេះមានរយៈពេល១ឆ្នាំ​ ចាប់ផ្ដើមសាងសង់នៅថ្ងៃទី១៥ ខែសីហា ឆ្នាំ២០២២ ដែលត្រូវបញ្ចប់នៅថ្ងៃទី១៧ ខែសីហា ឆ្នាំ២០២៣​ ដែលមានទំហំផ្ទៃដីសរុប ៩,៧៦៨ ម៉ែត្រ​ការ៉េ​(បណ្តោយ១០១,៣៩ម ទទឹង៩៦.៣៤ម)។​ ក្នុងនោះដែរមជ្ឈមណ្ឌល​ ក៏មាន​ជំនាញវិជ្ជាជីវៈចំនួន៥ជំនាញ​ រួមមាន​ ៖​ ជំនាញកាត់ដេរ,​ ជំនាញសាឡន,​ ជំនាញ​ធ្វើ​ម្ហូប​/បង្អែម,​ ជំនាញអគ្គិសនី និងទឹក,​ ជំនាញម៉ាស៊ីនត្រជាក់៕​ អត្ថបទ​ រឿង​ ចន្ទ្រា