ភ្នំពេញ៖ បេឡាជាតិសន្តិសុខសង្គម នៃក្រសួងការងារនិងបណ្តុះបណ្តាលវិជ្ជាជីវៈ និង​អង្គការ​អុកស្វាម នៅថ្ងៃទី១៨ ខែធ្នូ ឆ្នាំ២០២៣នេះ បានសហការរៀបចំវេទិកាប្រចាំឆ្នាំលើកទី១ ក្រោម​ប្រធាន​បទ «ដំណើរឆ្ពោះទៅរបបសន្តិសុខសង្គមប្រកបដោយបរិយាបន្ន ឆ្លើយតបយេនឌ័រ និង​ជា​សកល​នៅក​ម្ពុជា» ក្នុងគោលបំណងបង្កើតឱ្យមានកិច្ចពិភាក្សាគោលនយោបាយ ដើម្បីស្វែង​យល់​ពី​បញ្ហា​ប្រឈម និងដំណោះស្រាយនានា។

លោកស្រី ភាណ សោភ័ណ នាយិកាង្គការអុកស្វាម បានឲ្យដឹងថា បេសកកម្ម​របស់​អង្គការ​អុកស្វាម គឺដើម្បីលុបបំបាត់ភាពក្រីក្រ និងអយុត្តិធម៌ ហើយបានប្តេជ្ញាធ្វើការជាមួយ និង​គាំទ្រ​រាជ​រដ្ឋាភិបាលកម្ពុជា និងដៃគូពាក់ព័ន្ធដើម្បីកាត់បន្ថយភាពក្រីក្រ និង​វិសមភាព​ក្នុង​ចំណោម​កម្មករ​និយោជិត​ក្នុង​វិស័យកាត់ដេរ កសិករខ្នាតតូច កម្មករធ្វើការក្នុងសេដ្ឋកិច្ចក្រៅប្រព័ន្ធ ដែលភាគ​ច្រើន​​ជាស្ត្រី និងអ្នកម្តាយ ដើម្បីធានា​លទ្ធភាព​របស់​ពួកគេ​ក្នុង​ការ​ទទួល​បាន​របប​សន្តិសុខ​សង្គម​។ លោកបានបន្តថា វេទិកាថ្ងៃនេះ បានអញ្ញើញអ្នកឯកទេស អ្នកតាក់តែងគោលនយោបាយ និង​អ្នក​ផ្តល់ សេវាក្នុងក្របខណ្ឌរបបសន្តិសុខសង្គម ជាមួយថ្នាក់ដឹកនាំមូលដ្ឋាន និងតំណាង​កម្មករ​និយោជិត ដើម្បីជួបប្រជុំគ្នាស្វែងយល់ពីបញ្ហាប្រឈម និងដំណោះស្រាយ ដើម្បីជំរុញ​កម្ពុ​ជា​ឱ្យ​ឆ្ពោះ​ទៅ​ប្រព័ន្ធគាំពារសង្គមប្រកបដោយបរិយាបន្ន ឆ្លើយតបនឹងយេនឌ័រ និងជាសកល។ លោកស្រី បន្ថែមថា ការទទួលបានការគាំពារសង្គម គឺមាន​សារៈ​សំខាន់​ណាស់​សម្រាប់​កម្មករ​និយោជិត និងក្រុមគ្រួសាររបស់ពួកគេ ព្រោះជួយទ្រទ្រង់សុខុមាលភាព បង្កើនភាពធន់ និង​កាត់​បន្ថយ​ហានិភ័យនានា ដែលបណ្តាលពីគ្រោះមហន្តរាយ ឬជំងឺរាតត្បាតជាសកល និងទប់​ស្កាត់​ការ​ធ្លាក់​ចូល​ទៅក្នុងស្ថានភាពក្រីក្រជាដើម។

នៅក្នុងពិធីបើកវេទិកានាឱកាសនោះ ឯកឧត្តម ហេង សុផាន់ណារិទ្ធ អគ្គនាយក​រង​បេឡា​ជាតិ​សន្តិសុខ​សង្គម បានមានប្រសាសន៍ថា រាជរដ្ឋាភិបាលកម្ពុជា នៅក្នុងអាណត្តិកន្លងមក បាន​ដាក់​ចេញ​នូវ​យុទ្ធសាស្ត្រត្រីកោណ និងយុទ្ធសាស្ត្រចតុកោណទាំង៤ដំណាក់កាល ដែល​ជា​ដំណាក់​កាល​នៃ​ការ​កសាងជាតិ ដោយផ្តោតជា សំខាន់លើការស្តារ និងការកសាងប្រទេស ដែលទើប​ងើប​ចេញ​ពី​សង្គ្រាម, ការរក្សាសុខសន្តិភាព និងសណ្តាប់ធ្នាប់សង្គម, ការធ្វើ​សមាហរណ​កម្ម​ទៅ​ក្នុង​រចនា​សម្ព័ន្ធ និងនិម្មាបនកម្ម តំបន់ និងសកល, ការអភិវឌ្ឍ និងការរក្សាស្ថិរភាពសង្គម-សេដ្ឋកិច្ច និង​ការ​លើកកម្ពស់ជីវភាពប្រជាជន។ ហើយនៅក្នុងអាណត្តិទី៧ នៃរាជ​រដ្ឋាភិបាល​ក្រោម​ការ​ដឹកនាំ​ប្រកបដោយភាពឈ្លាសវៃ និងគតិបណ្ឌិតរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី​នៃ​កម្ពុជា បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដើម្បីកំណើន​ការងារ​សមធម៌​ ប្រសិទ្ធភាព និងចីរភាព ដើម្បីកសាង​មូលដ្ឋាន​គ្រឹះ​ឆ្ពោះទៅ​សម្រេច​ចក្ខុវិស័យ​កម្ពុជា​ឆ្នាំ​២០៥០​។

ឯកឧត្តម បានបន្តទៀតថា បញ្ចកោលទី១ ការអភិវឌ្ឍមូលធនមនុស្សមុំទី៤ ការ​ពង្រឹង​ប្រព័ន្ធ​គាំពារ​សង្គម គឺបង្ហាញពីការកសាង និងការអភិវឌ្ឍប្រព័ន្ធគាំពារសង្គម ឱ្យមានលក្ខណៈប្រមូលផ្តុំ និង​សង្គតិភាព ទាំងក្នុងប្រព័ន្ធជំនួយសង្គម និងប្រព័ន្ធសន្តិសុខសង្គម ដោយឈរលើស្មារតី “មិន​បោះ​បង់​ពលរដ្ឋខ្មែរណាម្នាក់”។

សូមជម្រាបជូនថា នេះជាវេទិកាលើកដំបូង ដែលរៀបចំឡើងទៅតាមសំណូមពររបស់ថ្នាក់ដឹកនាំ មូល​ដ្ឋាន និងតំណាងកម្មករនិយោជិត តាមរយៈវេទិកាថ្នាក់តំបន់ចំនួន៣ធំៗ ដែលបាន​រៀបចំ​កន្លង​មក ជាបន្តបន្ទាប់នៅតំបន់ប៉ូលសេដ្ឋកិច្ចសំខាន់ៗ មានដូចជា៖ សៀមរាប ខេត្តព្រះសីហនុ និង​ខេត្តស្វាយរៀង ចាប់ពីខែកក្តដា ដល់ខែវិច្ឆិកា ឆ្នាំ២០២៣។ តាមរយៈគម្រោង និង​កិច្ច​សហការ​ទាំង​នេះ ពលរដ្ឋ ថ្នាក់ដឹកនាំមូលដ្ឋាន និងកម្មករនិយោជិត ជាច្រើននាក់​បាន​ទទួល​ព័ត៌មាន​ពី​សិទ្ធិ​អត្ថប្រយោជន៍ និងសារៈសំខាន់នៃគោលនយោបាយសន្តិសុខសង្គម។ រាជរដ្ឋាភិបាល ក៏បានធ្វើការពង្រីកដែនគ្របដណ្តប់ បង្កើនអត្ថប្រយោជន៍នៃរបប សន្តិសុខសង្គម និង​កម្មវិធីជំនួយសង្គម ក៏ដូចជាការពង្រឹងយន្តការគណនេយ្យភាពសង្គម ក្នុងប្រព័ន្ធគាំពារសង្គម កម្ពុជា​ផងដែរ។ ទាំងនេះបានដើរតួរនាទីយ៉ាងសំខាន់ក្នុងការជួយពង្រឹងទំនាក់ទំនងល្អ និងទំនុក​ចិត្ត​ពីសាធារណៈជន ទៅលើអ្នកផ្តល់សេវា អ្នករាជការសាធារណៈ និងអ្នកតាក់តែង គោល​នយោបាយ​ផង​ដែរ។ ហើយអ្វីដែលពិសេសទៀតនោះ គឺបានចូលរួមកសាង និងពង្រឹងភាពធន់ លើក​កម្ពស់សមភាពយេនឌ័រ និងបរិយាបន្ននៅក្នុងសង្គមកម្ពុជាឱ្យបានកាន់តែល្អប្រសើរឡើង៕