ប្រភពរដ្ឋាភិបាលបាននិយាយកាលពីថ្ងៃសៅរ៍ (១៦ ធ្នូ) ថាប្រទេសជប៉ុន កំពុងធ្វើការរៀបចំចុងក្រោយដើម្បីបែងចែកថវិកា ៧,៧ សែនកោដិ៍យ៉េន ប្រហែល ៥៤ពាន់លានដុល្លារអាមេរិក ដល់ថវិកាការពារជាតិសម្រាប់សារពើពន្ធឆ្នាំ ២០២៤ ដែលជាផ្នែកនៃផែនការកសាងអាវុធដ៏ខ្លាំងក្លា នេះបើយោងតាមរបាយការណ៍របស់សារព័ត៌មាន ក្យូដូ ញ៉ូវស៍ (Kyodo News)។

សេចក្តីព្រាងថវិកានេះត្រូវបានគេរំពឹងថានឹងត្រូវអនុម័តក្នុងកិច្ចប្រជុំគណៈរដ្ឋមន្ត្រីនៅថ្ងៃសុក្រ (២២ ធ្នូ) ខាងមុខនេះ។ ក្នុងរយៈពេលប្រាំឆ្នាំដែលចាប់ផ្តើមពីសារពើពន្ធឆ្នាំ ២០២៣ ប្រទេសនេះគ្រោងនឹងបង្កើនការចំណាយលើវិស័យការពារជាតិរបស់ខ្លួនដល់ ៤៣ សែនកោដិ៍យ៉េន ដែលប្រហែលនឹង ៣០២,៥ពាន់លានដុល្លារអាមេរិក។

ប្រសិនបើថវិកាសម្រាប់សារពើពន្ធឆ្នាំ២០២៤ នេះត្រូវបានអនុម័តជាផ្លូវការ វានឹងលើសពីកម្រិតខ្ពស់ពីមុនដែលមានចំនួន ៦,៨ សែនកោដិ៍យ៉េន (៤៧,៨ពាន់លានដុល្លារអាមេរិក) នៅក្នុងថវិកាដំបូងសម្រាប់ឆ្នាំសារពើពន្ធបច្ចុប្បន្នរហូតដល់ខែមីនាឆ្នាំក្រោយ។

គេរំពឹងថា ការចំណាយពាក់ព័ន្ធ នឹងត្រូវប្រើប្រាស់សម្រាប់ការទិញមីស៊ីលរយៈចម្ងាយឆ្ងាយ និងការអភិវឌ្ឍន៍យន្តហោះចម្បាំងជំនាន់ក្រោយ។ ទោះជាយ៉ាងណា ពេលវេលានៃការដំឡើងពន្ធដើម្បីផ្តល់មូលនិធិដល់ការដំឡើងថវិកាមិនទាន់ត្រូវបានកំណត់នៅឡើយទេ៕