អាជ្ញាធរព្រែកជីកស៊ុយអេ ( Suez)របស់ប្រទេសអេហ្ស៊ីប (SCA) បានប្រកាសកាលពីថ្ងៃអាទិត្យថា ខ្លួនកំពុងតាមដានយ៉ាងដិតដល់នូវផលប៉ះពាល់នៃភាពតានតឹងផ្នែកយោធា នៅក្នុងសមុទ្រក្រហម បន្ទាប់ពីក្រុមហ៊ុនដឹកជញ្ជូនធំៗ បានផ្លាស់ប្តូរផ្លូវជំនួស ដោយសារតែការព្រួយបារម្ភអំពីសុវត្ថិភាព។

ប្រធាន SCA លោក Osama Rabie បាននិយាយនៅក្នុងសេចក្តីថ្លែងការណ៍មួយថា ចរាចរណ៍តាមផ្លូវ       សមុទ្រ គឺជារឿងធម្មតា នៅក្នុងព្រែកជីក ដែលតភ្ជាប់សមុទ្រមេឌីទែរ៉ាណេ និងសមុទ្រក្រហម។ លោកបានបន្ថែមថា SCA កំពុងវាយតម្លៃហ្មត់ចត់នូវផលប៉ះពាល់នៃក្រុមដឹកជញ្ជូនមួយចំនួន ដែលផ្លាស់ប្តូរផ្លូវរបស់ពួកគេជាបណ្តោះអាសន្ន ទៅកាន់ឆ្នេរសមុទ្រ Cape of Good Hope។

ក្នុងរយៈពេលប៉ុន្មានថ្ងៃថ្មីៗនេះ ក្រុមហ៊ុនដឹកជញ្ជូនធំៗចំនួន ៤ បាននិយាយថា កាត់បន្ថយ ឬផ្អាកការឆ្លងកាត់សមុទ្រក្រហម ដោយសារតែការវាយប្រហារម្តងហើយម្តងទៀតពីកងជីវពលហ៊ូធីរបស់ប្រទេសយេ   ម៉ែនលើនាវាពាណិជ្ជកម្ម នៅក្នុងតំបន់ ចាប់តាំងពីការផ្ទុះឡើងនៃជម្លោះអ៊ីស្រាអែល និងក្រុមហាម៉ាស កាលពីថ្ងៃទី៧ ខែតុលា។

លោក Rabie បាននិយាយថា មានតែនាវាចំនួន ៥៥គ្រឿងប៉ុណ្ណោះ ដែលបានប្តូរទិសឆ្លងកាត់ផ្លូវតាមឆ្នេរ សមុទ្រ Cape of Good Hope ចាប់តាំងពីថ្ងៃទី១៩ ខែវិច្ឆិកា បើធៀបនឹងការឆ្លងកាត់នៃនាវា ២.១២៨គ្រឿងឆ្លងកាត់ព្រែកជីកស៊ុយអេ ក្នុងអំឡុងពេលនោះ។

លោក បានបន្ថែមថា នាវាចំនួន ៧៧ គ្រឿង បានឆ្លងកាត់ព្រែកជីកស៊ុយអេ កាលពីថ្ងៃអាទិត្យ រួមទាំងនាវាមួយចំនួន ដែលជាកម្មសិទ្ធិរបស់ក្រុមដឹកជញ្ជូន ដែលបានប្រកាសពីផ្លាស់ប្តូរផ្លូវជាបណ្តោះអាសន្ន។