លោកស្រី Kristalina Georgieva នាយកគ្រប់គ្រងមូលនិធិរូបិយវត្ថុអន្តរជាតិ (IMF) បានប្រាប់សារព័ត៌  មាន Financial Times (FT) ថា ជំនួយហិរញ្ញវត្ថុរាប់ពាន់លានដុល្លារពីសហរដ្ឋអាមេរិក និងសហភាពអឺរ៉ុបគឺមានសារៈសំខាន់សម្រាប់ការស្តារសេដ្ឋកិច្ចរបស់អ៊ុយក្រែន។

លោកស្រី Georgieva បានថ្លែងថា សេដ្ឋកិច្ចរបស់អ៊ុយក្រែន ទំនងជាអាចទប់ទល់នឹងការពន្យារពេលផ្តល់មូលនិធិ«ពីរបីខែ»ទៀត ប៉ុន្តែការពន្យារពេលយូរជាងនេះ នឹងធ្វើឲ្យផ្លូវរបស់ប្រទេសនេះ ឆ្ពោះទៅរកការងើបឡើងវិញនៃសេដ្ឋកិច្ច មានហានិភ័យធ្ងន់ធ្ងរ។

ការព្រមានរបស់លោកស្រី កើតឡើង នៅពេលដែលទាំងសហរដ្ឋអាមេរិក និងសហភាពអឺរ៉ុប បានជួបការលំបាក ក្នុងការទទួលបានកញ្ចប់ថវិការាប់ពាន់លានដុល្លារសម្រាប់ប្រទេសអ៊ុយក្រែន។

សមាជិកសភាមកពីគណបក្សសាធារណរដ្ឋ នៅសហរដ្ឋអាមេរិក បន្តរារាំងច្បាប់ជំនួយហិរញ្ញវត្ថុចំនួន ៦១,៤ពាន់លានដុល្លារសម្រាប់អ៊ុយក្រែន ដោយភ្ជាប់ច្បាប់នេះនៅក្នុងការចរចាអំពីសន្តិសុខព្រំដែន ដែល ដែលទំនងជាអូសបន្លាយដល់ឆ្នាំក្រោយ។

កិច្ចខិតខំប្រឹងប្រែងរបស់សហភាពអឺរ៉ុប ក្នុងការផ្តល់ជំនួយចំនួន ៥៥ពាន់លានដុល្លារ ដល់អ៊ុយក្រែន ត្រូវបានរារាំងដោយនាយករដ្ឋមន្ត្រីហុងគ្រី លោក វីកទ័រ អ័របាន (Viktor Orban) ដែលបានវេតូជំនួយនៅក្នុងកិច្ចពិភាក្សា នៅទីក្រុងប្រ៊ុចសែល កាលពីថ្ងៃទី ១៤ ខែធ្នូ។