នៅថ្ងៃចន្ទនេះ ចិនបាននិយាយថា ខ្លួនសង្ឃឹមជឿជាក់ថាភាគីពាក់ព័ន្ធនឹងចាត់វិធានការ ដើម្បីរក្សាសន្តិភាព និងស្ថិរភាពនៅឧបទ្វីបកូរ៉េ ក្រោយកូរ៉េខាងជើង បាញ់មីស៊ីលអន្តរទ្វីប ICBM ។

លោក Wang Wenbin គឺជាអ្នកនាំពាក្យក្រសួងការបរទេសចិន និយាយនៅក្នុងសន្និសីទសារព័ត៌មានថា បញ្ហាជុំវិញបញ្ហាឧបទ្វីបកូរ៉េ គឺស្មុគស្មាញ ហើយលោកសូមជំរុញឲ្យមានការជជែកគ្នាពីភាគីសាមីខ្លួនទាំងអស់ ដើម្បីដោះស្រាយបញ្ហា ។

កូរ៉េខាងត្បូង បាននិយាយថា ប្រទេសកូរ៉េខាងជើង បានបាញ់មីស៊ីលបាលីស្ទីក ICBM កាលពីថ្ងៃអាទិត្យ ទី១៧ ខែធ្នូ ខណៈសហរដ្ឋអាមេរិក និងកូរ៉េខាងត្បូង បានព្រមានថា ការវាយប្រហារនុយក្លេអ៊ែរណាមួយ នឹងនាំទៅដល់ការបញ្ចប់របបរបស់ទីក្រុងព្យុងយ៉ាង។

អគ្គនាយសេនាធិការចម្រុះរបស់ទីក្រុងសេអ៊ូល បាននិយាយសំដៅទៅលើដែនទឹកដែលគេស្គាល់ថាជាសមុទ្រជប៉ុនថា យោធារបស់ពួកយើង បានរកឃើញមីស៊ីលបាលីស្ទីករយៈចម្ងាយជិត ដែលបានបាញ់ចេញពីតំបន់ទីក្រុងព្យុងយ៉ាង ឆ្ពោះចូលទៅសមុទ្រខាងកើតកាលពីថ្ងៃអាទិត្យ។ មីស៊ីលនេះ បានហោះក្នុងចម្ងាយប្រហែល ៥៧០គីឡូម៉ែត្រ មុនពេលធ្លាក់នៅសមុទ្រខាងកើត ហើយទីក្រុងសេអ៊ូល ទីក្រុងវ៉ាស៊ីនតោន និងទីក្រុងតូក្យូ បានចែករំលែកព័ត៌មានយ៉ាងជិតស្និទ្ធទាក់ទងនឹងមីស៊ីលបាលីស្ទីករបស់ប្រទេសកូរ៉េខាងជើង។

ដោយឡែក ក្រសួងការពារជាតិជប៉ុន និយាយថា ប្រទេសកូរ៉េខាងជើងបានបាញ់ ជាអ្វីដែលទំនងជាមីស៊ីលបាលីស្ទីក ដោយឆ្មាំល្បាតឆ្នេររបស់ខ្លួន ហើយវាហាក់ដូចជាបានធ្លាក់រួចទៅហើយ។ ការសាកល្បងនេះ ធ្វើឡើងខណៈទីក្រុងសេអ៊ូល និងទីក្រុងវ៉ាស៊ីនតោន បានព្រមានទីក្រុងព្យុងយ៉ាងថា រាល់ការវាយប្រហារនុយក្លេអ៊ែរណាមួយទៅលើសហរដ្ឋអាមេរិក និងកូរ៉េខាងត្បូង នឹងនាំឱ្យមានការបញ្ចប់របបកូរ៉េខាងជើង។

ជាប់ជួននឹងការបាញ់មីស៊ីល ICBM ជាលើកទី ៥នៅក្នុងឆ្នាំនេះរបស់កូរ៉េខាងជើងនេះដែរ ចិន និងកូរ៉េខាងជើង មាននូវជំនួបកម្រិតខ្ពស់នាថ្ងៃចន្ទនេះក្នុងទីក្រុងប៉េកាំង ។

ទីក្រុងប៉េកាំងដែលជាសម្ព័ន្ធមិត្តជិតស្និតបំផុតរបស់ទីក្រុងព្យុងយ៉ាង បានបញ្ជាក់ឡើងវិញពីការប្តេជ្ញាចិត្តរបស់ពួកគេក្នុងការពង្រឹងកិច្ចសហប្រតិបត្តិការជាមួយកូរ៉េខាងជើង ៕