គណបក្ស SNS ដែលកំពុងកាន់អំណាចរបស់ប្រទេសស៊ែប៊ី មិនត្រឹមតែបានអះអាងពីអំណាចនយោបាយរបស់ខ្លួនប៉ុណ្ណោះទេ ប៉ុន្តែថែមទាំងពង្រឹងឲ្យកាន់តែមាំឡើងៗទៀតផង។ នេះបើតាមអ្នកវិភាគមកពីមជ្ឈមណ្ឌលសម្រាប់ការបោះឆ្នោតដោយសេរី និងប្រជាធិបតេយ្យ (CeSID) ដែលបាននិយាយ នៅថ្ងៃចន្ទ (ទី១៨ ខែធ្នូ) នេះ បន្ទាប់ពីប្រធានាធិបតី លោក Aleksandar Vucic បានប្រកាសពីជ័យជម្នះនៅក្នុងការបោះឆ្នោតសភាមុនអាណត្តិ កាលពីថ្ងៃអាទិត្យ (ទី១៧ ខែធ្នូ)។

ដោយផ្អែកលើសន្លឹកឆ្នោត ដែលបានរាប់នៅក្នុងគំរូនៃការិយាល័យបោះឆ្នោតនានា អ្នកស្ទង់មតិ Ipsos និង CeSID បានព្យាករថា គណបក្សប្រជានិយម SNS ទទួលបានសំឡេងគាំទ្រ ៤៦,២ភាគរយ ខណៈសម្ព័ន្ធភាពស៊ែប៊ីប្រឆាំងនឹងអំពើហឹង្សា (SPN) ដែលជាគណបក្សប្រឆាំងកណ្ដាលឆ្វេងរបស់ប្រទេសនេះ នឹងមានសំឡេងលំដាប់ទី២ ដោយមានការគាំទ្រ ២៣,២ភាគរយ។

គណបក្ស SPN បានចោទប្រកាន់គណបក្សកាន់អំណាចពីបទក្លែងបន្លំការបោះឆ្នោត ហើយបាននិយាយថា ខ្លួននឹងប្តឹងទៅគណៈកម្មការបោះឆ្នោតរបស់រដ្ឋ។

បណ្ដាគណបក្ស និងសម្ព័ន្ធភាពសរុបចំនួន ១៨ បានឈរឈ្មោះប្រកួតប្រជែង ដើម្បីដណ្ដើមយកការគាំទ្រពីអ្នកបោះឆ្នោតចំនួន ៦,៥លាននាក់ សម្រាប់អាសនៈចំនួន ២៥០កៅអី នៅក្នុងសភា។ ចំនួនកំណត់នៃការចូលសភា គឺ ៣ភាគរយនៃសំឡេងឆ្នោត។ ការរាប់សន្លឹកឆ្នោតបឋម បានបង្ហាញថា គណបក្ស SNS នឹងមានសំឡេងភាគច្រើនដាច់ខាតយ៉ាងស្ដួចស្ដើងនៃចំនួនសមាជិកសភាយ៉ាងហោចណាស់ ១២៧រូប ដែលគ្រប់គ្រាន់ល្មម ក្នុងការគ្រប់គ្រងប្រទេសតែម្នាក់ឯងបាន ប៉ុន្តែគេរំពឹងថា នឹងមានការស្វែងរកដៃគូបង្កើតរដ្ឋាភិបាលចម្រុះ ដើម្បីពង្រឹងអំណាចសភា៕