ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃអង្គារទី ១៩ ខែធ្នូ នេះ ថា​មនុស្ស​យ៉ាង​ហោចណាស់​១១១ នាក់បានស្លាប់នៅ​ពេល​រញ្ជួយ​ដី​បាន​ផ្ដួល​រលំ​អគារ​ជា​ច្រើន​នៅ​ភាគ​ពាយព្យ​របស់​ប្រទេសចិន ខណៈក្រុមអ្នកជួយសង្គ្រោះបានប្រជែងពេលវេលា ចាប់ផ្តើមជីកក​កាយ​កម្ទេច​ថ្ម​បែក​បាក់។

ទូរទស្សន៍រដ្ឋ CCTV បាននិយាយ​ដោយ​ដក​ស្រង់​ពីទី​ស្នាក់​ការ​កណ្តាល​សម្រាប់​ការ​សង្គ្រោះគ្រោះ​រញ្ជួយ​ដី​របស់​ខេត្តនេះ ថា មនុស្សប្រហែល ១០០ នាក់បានស្លាប់ និងជាច្រើន​នាក់ទៀត​បាន​រង​របួស​នៅ​ក្នុងខេត្តកានស៊ូ (Gansu) បន្ទាប់ពីមានការរញ្ជួយដ៏ខ្លាំងក្លា និងកម្រិតរញ្ជួយរាក់ 

យោង​​តាម​ទូរទស្សន៍ CCTV មនុស្ស ១១ នាក់ផ្សេងទៀតបានស្លាប់ និង១០០ នាក់ផ្សេង​ទៀត​រង​របួស​នៅ​ក្នុងទីក្រុងហៃទុង (Haidong) នៃខេត្តជិតខាង ឈីងហៃ ( Qinghai)។ 

ទីភ្នាក់​ងារព័ត៌មានរដ្ឋ ស៊ីនហួ (Xinhua) បាននិយាយថា គ្រោះរញ្ជួយដីនេះបា​ន​បណ្តាល​ឱ្យ​មាន​ការ​ខូចខាតយ៉ាងធ្ងន់ធ្ងរ រួមទាំងលំនៅឋានដួលរលំ ហើយបានបញ្ជូនមនុស្ស ដែលរត់​ចូល​ទៅ​កាន់​តាម​ដង​ផ្លូវនានា ដើម្បីសុវត្ថិភាព។  

ការងារជួយសង្គ្រោះកំពុងដំណើរការនៅព្រឹកថ្ងៃអង្គារនេះ ដោយលោកប្រធានាធិបតីចិន Xi Jinping បានអំពាវនាវឱ្យមាន កិច្ចខិតខំប្រឹងប្រែងអស់ពីលទ្ធភាព ក្នុងការងារស្វែងរក និង​សង្គ្រោះ ​ក៏ដូចជាធានាសុវត្ថិភាពរបស់អ្នករស់រានមានជីវិត និងទ្រព្យសម្បត្តិរបស់ប្រជាពលរដ្ឋ។    

គ្រោះ​រញ្ជួយដី ដែលមជ្ឈមណ្ឌលភូគព្ភសាស្ត្រអាមេរិក និយាយថា មានកម្រិត ៥.៩រ៉ិចទ័រ បាន​វាយ​ប្រហារ​នៅ​ខេត្តកានស៊ូ ក្បែរព្រំដែនជាមួយទីក្រុងឈីងហៃ របស់ខេត្ត ហៃទុង។ ចំណុច​កណ្តាល​នៃ​ការ​រញ្ជួយ​ដីមានចម្ងាយប្រហែល ១០០ គីឡូម៉ែត្រភាគនិរតីនៃរដ្ឋធានីឡានចូវ ( Lanzhou )នៃខេត្ត កានស៊ូ ។ រលករញ្ជួយតូចៗជាច្រើន បានកើតឡើង​បន្ទាប់​ពី​ការ​រញ្ជួយ​ដី​ដំបូង​។

ចំណែក​ទីភ្នាក់ងារសារព័ត៌មានស៊ីនហួរបានរាយការណ៍ពីការរញ្ជួយដីនៅក្នុងទីក្រុង ស៊ីអាន Xi'an ក្នុង​ខេត្តសានស៊ី ( Shaanxi) ភាគខាងជើងចម្ងាយប្រហែល ៥៧០ គីឡូម៉ែត្រ ដែល​មាន​កម្រិត ៦,២រ៉ិចទ័រ​៕