ពិភពលោក៖ យោងតាមសារព័ត៌មាន Reuters ចំនួនអ្នកស្លាប់ទាក់ទងនឹងវីរុសកូរ៉ូណា នៅទូទាំងពិភពលោកបានហក់ឡើងជាង ៤លាននាក់កាលពីថ្ងៃព្រហស្បតិ៍ ខណៈដែលប្រទេសជាច្រើនកំពុងស្វះស្វែងធានាឲ្យបានវ៉ាក់សាំងគ្រប់គ្រាន់ សម្រាប់ចាក់ដល់ពលរដ្ឋរបស់ខ្លួន។
ខណៈចំនួនករណីឆ្លង និងស្លាប់ថ្មីបានធ្លាក់ចុះនៅក្នុងប្រទេសមួយចំនួន ដូចជាសហរដ្ឋ អាមេរិក ចក្រភពអង់គ្លេសជាដើមនោះ ប្រទេសមួយចំនួនបានខ្វះវ៉ាក់សាំង ខណៈវីរុសបម្លែងខ្លួនថ្មី Delta ក្លាយជាវីរុសឆ្លងរាតត្បាតខ្លាំងនៅជុំវិញពិភពលោក។ យោងតាមការវិភាគរបស់សារព័ត៌មាន Reuters អ្នកស្លាប់ដោយសារជំងឺ COVID-19 បានហក់ឡើងជាង ២លាននាក់ត្រឹមរយៈពេលជាង ១ឆ្នាំ ខណៈចំនួន ២លាននាក់ទៀតត្រូវបានកត់ត្រាក្នុងរយៈពេលត្រឹមតែ ១៦៦ថ្ងៃ។
ប្រទេសចំនួន ៥ ដែលមានមនុស្សស្លាប់សរុបខ្ពស់បំផុតគឺសហរដ្ឋអាមេរិក ប្រេស៊ីល ឥណ្ឌា រុស្ស៊ី និងម៉ិកស៊ិកស្មើប្រហែល ៥០% នៃចំនួនអ្នកស្លាប់ទាំងអស់ក្នុងពិភពលោក ខណៈដែលប្រទេសប៉េរូ ហុងគ្រី បូស្នៀ សាធារណៈរដ្ឋឆែក និងដែនដីហ្គីប្រាលតា មានអត្រាស្លាប់ខ្ពស់បំផុតគិតតាមចំនួនប្រជាជនសរុបរបស់ខ្លួន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
