នៅពេលនេះក្រសួងមហាផ្ទៃ បានប្រកាស​នឹងអនុវត្ត​សាកល្បង​ប្រើប្រាស់​ប្រព័ន្ធ​អេត្រូនិច​សលាកបត្រ​ចូលកម្ពុជា មុនពេលមកដល់។ តាមការឲ្យដឹងពី​អគ្គនាយក​អន្តោ​ប្រវេសន៍​ក្រសួង​មហា​ផ្ទៃថា ការអនុវត្តសាកល្បងឲ្យអ្នកដំណើរជាតិ និងអន្តរជាតិ បំពេញសលាកបត្រចូលកម្ពុជា តាម​ប្រព័ន្ធអនឡាញនោះ នឹងចាប់ផ្តើមអនុវត្តមុនគេ នៅក្នុងច្រកទា្វរអាកាសយាន្តដ្ឋានអន្តរជាតិ សៀមរាបអង្គរ។

អគ្គនាយកអគ្គនាយកដ្ឋានអន្តោប្រវេសន៍ ឧត្តមសេនីយឯក សុខ វាសនា អោយBTV​ដឹង​នៅ​ថ្ងៃ​ទី​១៩​ ខែធ្នូនេះថា ការអនុវត្ត​សាកល្បង​ប្រើប្រាស់​ប្រព័ន្ធ​អេឡិច​ត្រូនិច​បំពេញ​សលាក​បត្រ​ចូល​កម្ពុជា​ ដែលមានឈ្មោះហៅថា Cambodia e-Arrival (CeA) សម្រាប់អ្នកដំណើរជាតិ និង​អន្តរជាតិ នៅដើមឆ្នាំ២០២៤នេះ គឺនឹង​ចាប់​ផ្តើម​អនុវត្ត​នៅ​ក្នុង​អាកាស​យាន្ត​អន្តរជាតិ​សៀមរាប​អង្គរ នៅខេត្តសៀមរាបមុនគេ ហើយនៅ​ពេល​នេះ​មន្ត្រី​អន្តោប្រ​វេសន៍​ក៏​បាន​ត្រៀម​ខ្លួន​រាល់​អនុវ​ត្ត​ឲ្យ​បាន​ល្អ​ប្រសើរទៅតាមសេចក្តីជូនដំណឹងរបស់ក្រសួងមហាផ្ទៃ។

តាមការបញ្ជាក់​បន្ថែម​ពីឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យ​ក្រសួង​ទេសចរណ៍ បានថ្លែងថា ការអនុវត្ត​បំពេញ​ឯក​សារ​សលាកបត្រ​ចេញ​ចូល​ប្រទេស​កម្ពុជា​តាម​ប្រព័ន្ធ​អនឡាញនោះ​ នឹងផ្តល់ភាពងាយស្រួលបណ្តាអ្នកដំណើរជាតិអន្តរជាតិ ជាពិសេស​គ្រប់​ភ្ញៀវ​ទេសចរអន្តរជាតិដែលធ្វើដំណើរចូលមកទស្សនាកម្ពុជា។

តាមសេចក្តីជូនដំណឹងរបស់ក្រសួងមហាផ្ទៃ៖ កា​រ​អនុវត្ត​សាក​ល្បង​ប្រព័ន្ធ​អេឡិច​ត្រូនិច​សលា​ក​បត្រ​ចូល​ព្រះរាជាណាចក្រកម្ពុជា មុនពេលមកដល់ គឺមានគោល​បំណង​បង្ក​លក្ខណៈ​ងាយ​ស្រួល​ជូន​អ្នក​ដំណើរអន្តរជាតិជាជនបរទេស និងពលរដ្ឋខ្មែរ លើការងារបំពេញបែបបទអន្តោប្រវេសន៍ បែប​បទ​គយ និងបែបបទសុខភាព ក្នុងទម្រង់តែម តាមគេហទំព័រ www.arrival.gov.kh ឬ​តាម​កម្មវិធី Cambodia e-Arrival (CeA) ដែលមានក្នុង App Store ឬ Playstore តាមទូរសព្ទដៃ។

នៅក្នុង​ដំណើរការចាប់ផ្តើមអនុវត្តសាកល្បងពីថ្ងៃទី១ ខែមករា រហូតដល់ថ្ងៃទី​៣០ ខែ​មិថុនា ឆ្នាំ​២០២៤​នេះ គឺគ្រប់អ្នកដំណើរជាតិអន្តរជាតិ គឺមានជម្រើស​អាច​បំពេញ​ព័ត៌មាន​តាម​ទម្រង់​ជា​អេឡិច​ត្រូនិចក៏បាន ឬអាចបំពេញព័ត៌មានក្នុងសលាកបត្រជាក្រដាសក៏បាន៕ អត្ថបទ ស៊ុមសុខជា