ក្រុមអាជីវករបានបង្ហាញអារម្មណ៍សប្បាយរីករាយ ខណៈ​ផលិតផលខ្មែរ​ដែល​បាន​យក​មក​ដាក់​តាំង​បង្ហាញ​ទទួលបានការគាំទ្រយ៉ាងខ្លាំងពីសំណាក់អតិថិជន ក្នុងកម្មវិធីពិព័រណ៍ផលិតផលខ្មែរ និង​ទំនិញនាំចេញ-នាំចូលលើកទី១៦ រយៈពេល ៤ថ្ងៃកន្លង​ទៅ​នេះ​ដែល​រៀបចំ​ឡើង​ដោយ​ក្រសួង​ពាណិជ្ជកម្ម​កម្ពុជា នៅកោះពេជ្រ។

អ្នកស្រី ឡោ វណ្ណារី ម្ចាស់សិប្បកម្មប្រេងលាបរិត សញ្ញាលោកតា មុន្នីឥស្សីដៃទិព្វ ពូកែស័ក្តិសិ៍ទ្ធិ មក​ពី​ក្រុង​ប៉ោយប៉ែត ខេត្តបន្ទាយមានជ័យ បានឲ្យទូរទស្សន៍ព័ត៌មាន ប៊ីធីវី ដឹងថា នេះជា លើកទី២ ហើយ ដែលអ្នកស្រីបាន​ចូលរួម​តាំង​បង្ហាញ​ផលិតផល​នេះ​ឡើង​ក្នុង​ព្រឹត្តិការណ៍​ពិព័រណ៍​នេះ ហើយនឹងចូលរួមបន្តទៀតនៅក្នុងពេលខាងមុខ ដោយសារ​តែ​សន្ទុះ​នៃ​ការ​គាំទ្រ​កើន​ឡើង​ជា​លំដាប់​ពី​សំណាក់អតិថិជនជាតិ និងអន្តរជាតិ។ អ្នកស្រីបានបន្តថា អ្នកស្រីពិតជារំភើប និង​សប្បាយ​ចិត្ត​ណាស់ ពេលដែលផលិតផលជាតិ មានការគាំទ្រជាហូហែរបែបនេះ និងបាន​សំណូមពរ​បន្ថែមថា សូមឲ្យប្រជាពលរដ្ឋខ្មែរទាំងអស់ បន្តជួយគាំទ្រផលិតផលខ្មែរ ដើម្បី​ជា​កម្លាំង​ចិត្ត​ដល់​ផលិតករ និងជួយលើកស្ទួយកុំឲ្យប្រជាជនចំណាកស្រុកជាដើម។

ដោយឡែកអ្នកស្រី លីម ប៉ុននី ម្ចាស់សិប្បកម្មបោះដុំត្រីស្រស់ ត្រីងៀត ត្រីឆ្អើរ ប្រហុក និង​ផ្អក​គ្រប់​ប្រភេទ មកពីស្រុកព្រៃឈរ ខេត្តកំពង់ចាម និងអ្នកស្រី វណ្ណ ម៉េត អាជីវករលក់ហូល មកពី​ខេត្ត​តាកែវ ដែលបានចូលរួមក្នុងកម្មវិធីពិព័រណ៍នេះដូចគ្នា បានលើកឡើងស្រដៀងគ្នាថា គ្រប់​ផលិត​ផលរបស់ខ្មែរទាំងអស់ ទទួលបានការចាប់អារម្មណ៍ជាច្រើនពីសំណាក់ភ្ញៀវជាតិ និង​បរទេស ថែមទាំងលក់ដាច់ចេញច្រើនផងដែរ ទោះបីជាការចំណេញតិច ប៉ុន្តែ​ការ​គាំទ្រ​មាន​ច្រើន​លើស​លុប។ អាជីវករទាំងនោះបានអំពាវនាវប្រជាពលរដ្ឋទាំងអស់ ឲ្យបន្តជួយ​គាំទ្រ​ផលិត​ផល​ខ្មែរ​កាន់​តែច្រើថែមទៀត ដើម្បីជួយបង្កើតការងារជូនពលរដ្ឋខ្មែរ ក៏ដូចជាជំរុញ​សេដ្ឋកិច្ច​រីក​ចម្រើន​។

សូមរម្លឹកថា ក្រសួងពាណិជ្ជកម្ម កាលពីថ្ងៃទី១៥ ដល់១៨ ខែធ្នូ ឆ្នាំ២០២៣កន្លងទៅ បាន​រៀប​ចំ​ពិ​ព័រណ៍ផលិតផលខ្មែរ និងទំនិញនាំចេញ-នាំចូល លើកទី១៦ នៅមជ្ឈមណ្ឌលសន្និបាត និង​ពិព័រណ៍​កោះពេជ្រ ក្នុងគោលបំណងលើកកម្ពស់សកម្មភាពពាណិជ្ជកម្ម និងវិនិយោគនៅកម្ពុជា ជា​ពិសេសដើម្បីជំរុញការតភ្ជាប់ទំនាក់ទំនងពាណិជ្ជកម្ម រវាងកម្ពុជា និងសហគម​អន្តរជាតិ​ដោយ​មាន​ស្តង់​សរុបចំនួន ២៣២ស្តង់ ក្នុងនោះផលិតផលក្នុងស្រុកមកពីតំបន់ផ្សេងៗគ្នាចំនួន ១៦៤​ស្តង់​៕ អត្ថបទ៖ ឈិត បូរ៉ាវី