ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ នៅ​រសៀលថ្ងៃទី១៨ ខែធ្នូ ឆ្នាំ២០២៣នេះ បានជួបសម្តែងការគួរសម លោក Jingyuan Xia ទី​ប្រឹក្សា​ពិសេស​របស់អគ្គនាយក FAO ទីស្នាក់ការកណ្តាលទីក្រុងរ៉ូម ដើម្បីពិភាក្សា​គ្នា​ក្នុង​ការ​ការ​លើក​កម្ពស់​ជីវភាពប្រជាកសិករនៅកម្ពុជា។

នៅក្រោយចប់ជំនួបការងារនេះ ក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ឲ្យដឹងថា ក្នុង​ជំនួប​នេះ ឯកឧត្តមរដ្ឋមន្ត្រី បាន​ស្វាគមន៍​ចំពោះ​កិច្ច​សហប្រតិបត្តិការ​ក្នុង​ការ​ចូលរួម​អភិវឌ្ឍ​វិស័យ​កសិកម្ម​នៅ​កម្ពុជា ជាពិសេសការការពារ និងគ្រប់គ្រងកត្តាចង្រៃលើផលិតផលកសិកម្ម និង​ការផ្សព្វផ្សាយការងារភូតគាមអនាម័យ (SPS)។ ជាមួយគ្នានេះដែរ ឯកឧត្តម បាន​គូស​បញ្ជាក់​អំពី​គោល​នយោបាយកសិកម្មក្នុងការជំរុញសហគមន៍កសិកម្មទំនើប និងការដាក់​ពង្រាយ​មន្ត្រី​ផ្សព្វ​ផ្សាយ​កសិកម្មតាមភូមិឃុំ ដែលទើបរៀបចំការប្រលងជ្រើសរើសជំហានដំបូងឆ្នាំ២០២៣ ចំនួន ២៥០នាក់ ដើម្បីជួយកសិករលើបច្ចេកទេស ទីផ្សារ និងបញ្ហា​ប្រឈម​ផ្សេង​ៗ​ឱ្យ​បាន​ទាន់​ពេល​វេលា និងមានប្រសិទ្ធភាព ក្នុងផលិតកម្ម និងខ្សែច្រវាក់តម្លៃ ដើម្បីឱ្យចំណាយថ្លៃដើមទាប ទទួល​តម្លៃបន្ថែមខ្ពស់ និងចំណេញច្រើន។

បើតាមឯកឧត្តមរដ្ឋមន្ត្រី ក្រសួងត្រូវការដៃគូណា ដែលអាចផ្តល់កម្ចីដែលមានអត្រាការប្រាក់ទាប ជួយ​ដល់​សហគមន៍កសិកម្មអាចវិនិយោគឈានទៅរកភាពរឹងមាំ និងនិរន្តរភាព​សេដ្ឋកិច្ច​ពិត​ប្រាកដ ​លើមុខដំណាំសំខាន់ៗដូចជាអង្ករ ស្វាយចន្ទី និងបន្លែ ព្រមទាំង​ផលិតផល​មាន​សក្តា​នុពល​ដទៃ​ទៀត៕