​បាល់ទាត់៖ ​អ្នកចាំទី​ជើងចាស់​អ៊ីតាលី Gianluigi Buffon នៅ​មិនទាន់​គិតពី​រឿង​ចូលនិវត្តន៍​ឡើយ​ ទោះ​ឈាន​មកដល់​វ័យ ៤៣ឆ្នាំ​ក៏ដោយ បន្ទាប់ពី​ចុះ​កិច្ច​សន្យា​ ២​ឆ្នាំ​ផ្ទេរ​ទៅ​ក្លិប​ចាស់​របស់ខ្លួន​ដែល​បាន​ចាកចេញ​អស់​រយៈពេល ២០​ឆ្នាំ​មក​ហើយ​។

​​កីឡាករ​វ័យ ៤៣​ឆ្នាំ​រូប​នេះ​បាន​ចុះហត្ថលេខា​លើ​កិច្ចសន្យា ២​ឆ្នាំ​លេង​អោយ​ក្លិប​ Parma ដែល​បាន​ធ្លាក់​ទៅកាន់​ក្រប​ខណ្ឌ​ទី​ពីរ​អ៊ីតាលី Serie B ទៅ​ហើយ​។ ​Gianluigi Buffon បាន​ចាក​ចេញពី​សេះបង្កង់ Juventus នៅ​ដំណាច់​រដូវ​កាល​កន្លងទៅ ​ដែល​ជាការ​ប្រកប​អាជីព​ជាមួយ​ក្លិប​នៅ​ទីក្រុង Turin មួយ​នេះ​ជា​លើក​ទី២​។​ ម្ចាស់​ជ័យ​លាភី World Cup ២០០៦ ជាមួយ​ក្រុម​ជំរើសជាតិ​អ៊ីតាលី​រូប​នេះ​បាន​បង្ហាញ​ខ្លួន​សរុប ១៧៦​លើក​អោយ​អ៊ីតាលី និង​កំពុង​កាន់​កំណត់ត្រា​កីឡាករ​បង្ហាញខ្លួន​នៅ​ក្រប​ខណ្ឌ​កំពូល​អ៊ីតាលី Serie A ច្រើន​ប្រកួត​ជាងគេ​ដែរ​សរុប ៦៥៦ ប្រកួត​បូករួម​ទាំង​ការ​បង្ហាញ​ខ្លួន ១៤​លើករដូវ​កាល​មុន​។​

​រំលឹក​ថា Gianluigi Buffon ធ្លាប់​បាន​បង្ហាញខ្លួន​លើកដំបូង​បំផុត​អោយ Parma កាលពី​ឆ្នាំ​១៩៩៥ ក្នុង​វ័យ​ត្រឹមតែ ១៧​ឆ្នាំ​។ ​នៅ​ឆ្នាំ​២០០១ គេ​បាន​ចាកចេញ​ទៅកាន់ Juventus ក្នុង​តំលៃ​ផ្ទេរ ២៣.៣​លាន​ផោន​ ដែល​ជា​តំលៃ​ផ្ទេរ​អ្នកចាំទី​ថ្លៃ​បំផុត​នៅ​ពេល​នោះ​។ ​Buffon ក៏​ធ្លាប់​លេង​បាន ១​រដូវ​កាល​ឱ្យ​ក្លិប​បារាំង Paris Saint Germain នៅ​ឆ្នាំ​២០១៨ មុន​ត្រលប់​មកកាន់ Juventus វិញ​នៅ​ឆ្នាំ​២០១៩៕

​អត្ថបទ​៖​នាង សុភា​វុ​ធ