ក្រសួងការពារជាតិរបស់ទីក្រុងសេអ៊ូល បាននិយាយថា ប្រទេសកូរ៉េខាងត្បូង សហរដ្ឋអាមេរិក និងជប៉ុន nនៅថ្ងៃអង្គារ (ទី១៩ ខែធ្នូ) បានចាប់ផ្ដើមធ្វើឲ្យសកម្មប្រព័ន្ធចែករំលែកទិន្នន័យតាមពេលវេលាជាក់ស្តែងអំពីការបាញ់មីស៊ីលរបស់កូរ៉េខាងជើង ខណៈដែលប្រទេសទាំង៣ កំពុងស្វែងរកការពង្រឹងកិច្ចសហប្រតិបត្តិការសន្តិសុខប្រឆាំងនឹងកូរ៉េខាងជើង ដែលមានអាវុធនុយក្លេអ៊ែរ។

សេចក្តីប្រកាសនេះបានធ្វើឡើងមួយថ្ងៃបន្ទាប់ពីទីក្រុងព្យុងយ៉ាង បានបាញ់សាកល្បងមីស៊ីលផ្លោងអន្តរទ្វីប ឬមីស៊ីលបាលីស្ទិក Hwasong-18 ដែលជាអាវុធដ៏ធំបំផុត ក្នុងឃ្លាំងអាវុធរបស់ប្រទេសនេះ។ ក្រសួងបានឲ្យដឹងនៅក្នុងសេចក្តីថ្លែងការណ៍ថា៖ «សមត្ថភាពប្រតិបត្តិការពេញលេញនៃប្រព័ន្ធចែករំលែកតាមពេលវេលាជាក់ស្តែង សម្រាប់ទិន្នន័យព្រមានមីស៊ីលកូរ៉េខាងជើង ត្រូវបានបញ្ជាក់តាមរយៈការវាយតម្លៃជាមុន នាពេលថ្មីៗនេះ ហើយបច្ចុប្បន្នកំពុងដំណើរការធម្មតា»។

ក្រសួងបានបន្ថែមថា៖ «ប្រទេសទាំង៣ បានបង្កើតប្រព័ន្ធនេះ ដើម្បីធានាសុវត្ថិភាពរបស់ពលរដ្ឋរបស់ខ្លួន ដោយរកឃើញ និងវាយតម្លៃពីមីស៊ីល ដែលកូរ៉េខាងជើងបានបាញ់ក្នុងពេលវេលាជាក់ស្តែង»។

ប្រព័ន្ធចែករំលែកទិន្នន័យនេះ គឺជាផ្នែកមួយនៃកិច្ចព្រមព្រៀង រវាងប្រមុខការពារជាតិនៃប្រទេសទាំង៣ កាលពីខែមុន ដែលរួមបញ្ចូលផងដែរនូវការបង្កើតផែនការរយៈពេលច្រើនឆ្នាំ សម្រាប់សមយុទ្ធយោធាត្រីភាគី។

មេដឹកនាំកូរ៉េខាងជើង លោក Kim Jong Un (គីម ជុងអ៊ុន) ដែលជាអ្នកគ្រប់គ្រងលើការបាញ់បង្ហោះចុងក្រោយនេះ បាននិយាយថា ខ្លួនបានបង្ហាញពីជម្រើស ដែលទីក្រុងព្យុងយ៉ាងនឹងធ្វើ «នៅពេលដែលទីក្រុងវ៉ាស៊ីនតោនធ្វើការសម្រេចចិត្តខុស»។

ទីក្រុងសេអ៊ូល និងទីក្រុងវ៉ាស៊ីនតោន បានបង្កើនកិច្ចសហប្រតិបត្តិការលើវិស័យការពារជាតិ នៅចំពោះមុខនៃការសាកល្បងអាវុធជាបន្តបន្ទាប់ ដោយទីក្រុងព្យុងយ៉ាងក្នុងឆ្នាំនេះ៕